14. apríl 1994 | Minningargreinar | 817 orð

Albert S. Guðmundsson - viðb Einhver litríkasti íþrótta- og stjórnmálamaður

Albert S. Guðmundsson - viðb Einhver litríkasti íþrótta- og stjórnmálamaður landsins á þessari öld, Albert Guðmundsson, lést hinn 7. apríl sl. Hann fæddist í Reykjavík hinn 5. október 1923, sonur hjónanna Guðmundar Gíslasonar gullsmiðs og konu hans, Indíönu Bjarnadóttur. Þau hjón áttu átta börn, sjö syni og eina dóttur, og var Albert þeirra elstur.

Albert ólst upp í gamla austurbænum í Reykjavík og hneigðist snemma til knattspyrnu. Jafnframt kynntist hann ungur að árum starfi KFUM svo og stofnanda þess og leiðtoga til margra ára, séra Friðrik Friðrikssyni. Kynni hans af séra Friðrik höfðu mikil áhrif á Albert og minntist hann gamla mannsins oft. Knattspyrnan var í hávegum höfð innan KFUM enda séra Friðrik orðlagður áhugamaður um íþróttina. Leið því ekki á löngu áður en að Albert hóf æfingar hjá Knattspyrnufélaginu Val enda tengslin milli KFUM og félagsins ákaflega náin.

Fljótt kom í ljós að Albert bjó yfir fágætum eiginleikum sem knattspyrnumaður. Á uppvaxtarárum sínum spilaði hann með öllum yngri flokkum Vals. Strax og aldur leyfði vann hann sér fastan sess í meistaraflokki félagsins en á þessum árum var lið Vals mjög sterkt. Í liðinu voru þá meðal annarra kappar eins og Hermann Hermannsson, markmaður, Grímar Jónsson, Frímann Helgason, Sigurður Ólafsson, Snorri Jónsson og Ellert Sölvason (Lolli) svo nokkrir séu nefndir. Með Val vann Albert marga glæsta sigra.

En það voru ekki aðeins félagar Alberts og samlandar sem fengu að njóta hæfileika hans sem knattspyrnumanns, sem sumir hafa líkt við töfrabrögð. Í kjölfar brottfararprófs frá Samvinnuskólanum árið 1945 hélt hann til framhaldsnáms í verslunarfræðum í Glasgow. Ekki hafði hann dvalið þar lengi þegar forsvarsmenn stórliðsins Glasgow Rangers höfðu spurnir af einstökum hæfileikum hans og buðu honum að koma til félagsins. Eftir skamma viðdvöl hjá Rangers lá leiðin til London en þar spilaði Albert með hinu fornfræga liði Arsenal. Þar sem ekki tókst að afla atvinnuleyfis fyrir Albert í Englandi varð dvölin hjá Arsenal ekki lengri en rúmlega eitt ár. Það var síðan á árinu 1947 sem Albert gerði atvinnumannssamning við franska knattspyrnufélagið Nancy. Hann var ekki aðeins fyrsti Íslendingurinn sem gerðist atvinnumaður í knattspyrnu heldur mun hann vera fyrsti atvinnuknattspyrnumaður Norðurlanda.

Eftir ársdvöl hjá Nancy lá leiðin til hins fræga og auðuga félags AC Milan á Ítalíu en með því liði lék Albert á hátindi ferils síns. hann var dáður af áhangendum og virtur af andstæðingum enda á þessum árum talinn einhver besti leikmaður í Evrópu. Eftir að samningurinn við Milan rann út lá leiðin aftur til Frakklands, nú til Parísar þar sem hann lék með Racing Club de Paris. Feril sinn sem atvinnuknattspyrnumaður endaði Albert síðan hjá franska félaginu Nizza. Með Nizza náði hann m.a. því langþráða markmiði að verða Frakklandsmeistari í knattspyrnu. Árið 1954 sagði Albert skilið við atvinnuknattspyrnu og sneri heim eftir næstum áratugs frægðarför um helstu knattspyrnuvelli Evrópu.

Albert er að sönnu einhver mesti afreksmaður í íþróttum sem Ísland hefur alið. Hann var dáður og virtur af milljónum manna í álfunni sem einhver glæsilegasti leikmaður síns tíma. Slíkum árangri og frama í íþróttum ná ekki aðrir en þeir sem búa bæði yfir gífurlegum líkamlegum og andlegum styrk, sjálfsaga og eru reglusamir. Yfir þessum kostum bjó Albert í ríkum mæli. Að auki var atorku hans og drenglyndi við brugðið. Því kom ekki óvart þó að hann hafi eftir heimkomuna gerst áhrifamaður í félagsmálum, fyrst einkum innan íþróttahreyfingarinnar og síðar sem einhver áhrifamesti og litríkasti stjórnmálamaður landsins um árabil.

Þrátt fyrir hinn glæsta frama erlendis og síðar erilsöm störf hér heima gleymdi Albert aldrei gamla félaginu sínu sem hafði fóstrað hann í æsku. Hann var stoltur af því að vera Valsmaður rétt eins og félagið er stolt af þeim heiðri að hafa átt sinn þátt í því að búa hann undir framabrautina. Valur gat alltaf reitt sig á stuðning hans þegar mikið lá við. Einkum var Albert félaginu oft innan handar í sambandi við þátttöku þess í þeim fjölmörgu Evrópukeppnum sem það hefur tekið þátt í á liðnum áratugum. Þar hefur ætíð komið sér vel að hafa að bakhjarli jafn vel kynntan og reynsluríkan mann úr evrópskri knattspyrnu og hann. Albert hefur verið sæmdur öllum helstu heiðursmerkjum Vals, síðast gullorðunni 1971.

Albert kvæntist frú Brynhildi Hjördísi Jóhannsdóttur 1946, orðlagðri sómakonu sem lifir eiginmann sinn. Þau eignuðust þrjú börn, þau Helenu Þóru, Inga Björn og Jóhann Halldór. Eins og oftast falla epli sjaldnast langt frá eikinni því öll börn Alberts hafa tekið virkan þátt bæði í leik og starfi innan Vals. Ingi Björn var t.d. einhver dáðasti leikmaður meistaraflokks Vals á síðustu tveimur áratugum auk þess sem hann þjálfaði meistaraflokk félagsins frá 1989 til 1992 með mjög góðum árangri.

Að leiðarlokum þakka aldnir sem ungir Valsmenn Albert Guðmundssyni margþættar gleði- og ánægjustundir í leik og starfi á liðnum áratugum. Þeir munu ætíð minnast hans sem einhvers besta og fræknasta sonar Knattspyrnufélagsins Vals. Frú Brynhildi, börnum þeirra, barnabörnum og öðrum ættingjum og vinum vottar félagið sína innilegustu samúð.

Knattspyrnufélagið Valur.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.