Orka Annska Ólafsdóttir segir 5Rytma dansinn skemmtilega líkamsrækt og góða fyrir líkama og sál.
Orka Annska Ólafsdóttir segir 5Rytma dansinn skemmtilega líkamsrækt og góða fyrir líkama og sál.
[ Smellið til að sjá stærri mynd ]
Í 5Rytmadansi er það kallað að dansa ölduna þegar fimm ólíkir rytmar koma saman. Dansinn miðar að auknu flæði í líkamanum og skapar hver sinn dans innan ákveðins form en ákveðin spor skipta í raun ekki máli.

María Ólafsdóttir

maria@mbl.is

Fimm rytmar; flæði, stakkató, kaos, lýrík og kyrrð, koma saman í svokölluðum 5Rytmadansi. Um er að ræða frjálsan dans þar sem engin spor eru að þvælast fyrir fólki.

Rytmarnir eru andleg leið í gegnum hreyfingu og fyrir marga leiðin að hinum innsta kjarna. Dansinn er þróaður af Bandaríkjakonunni Gabrielle Roth og hefur notið vaxandi vinsælda hér á landi síðastliðin ár. Tveir kennarar hérlendis hafa öðlast kennsluréttindi í 5Rytmadansi, þær Sigurborg Hannesdóttir og Annska Ólafsdóttir.

Dansinn þinn þann daginn

Rytmarnir fimm eru grunnur dansins og þegar þeim er miðlað af þjálfuðum og reyndum kennurum gefa þeir styrka leiðsögn í því að hjálpa fólki að finna sig án tillits til aldurs og reynslu. Muna að við erum næmar manneskjur í fallegum, kraftmiklum og heillandi heimi og uppgötva að bæði í töfrastundum lífsins og í hversdagsleikanum er iðandi lífskraftur.

„Ég hef sótt í þetta aftur og aftur og fæ einhvern veginn ekki leið á því því þetta er alltaf nýtt og ferskt. Það eru engar fyrirfram ákveðnar hreyfingar nema þær sem eiga heima í hverjum rytma fyrir sig en fyrst og síðast er þetta dansinn minn þann daginn. Það eru engin spor, sem er það besta við þetta allt saman. Ég get ekki lært fleiri en tvö dansspor í röð og hefur aldrei hentað mér að vera í svona almennri danskennslu en þetta er alveg mitt. Í dansinum endurheimtir fólk líka jafnvægi og finnur aftur tenginguna við kjarnann, sjálfið, sem hefur grafist undir gráum hversdagsleikanum,“ segir Annska.

Heill heimur dans

Í grunninn er dansinn sá hinn sami þótt einhverjar breytingar verði á honum frá ári til árs. Kallað er að dansa ölduna þegar þessir fimm rytmar koma saman og kemur hver og einn kennari með sitt innlegg og hefur þannig áhrif á dansinn. Því verða námskeiðin eins mismunandi og þau eru mörg. Grunnurinn er kenndur hér heima en fyrir utan það fylgir þessum dansi heill heimur heimspeki og fræða. Notuð er alls konar tónlist í 5Rytma dansi en Gabrielle Roth hefur líka gefið út sérstaka geisladiska með 5rytma tónlist. Annars segir Annska í raun allt notað sem fái fólk til að hreyfa sig. „Þetta er virkilega skemmtileg líkamsrækt og virkar ekki bara á líkamann heldur tekur maður til í sér í leiðinni. Það gerist eiginlega bara sjálfkrafa og ég hvet fólk til þess að leyfa sér að prófa. Það er eins og við þurfum oft að gefa okkur einhverja heimild. Ég upplifi að fólk er stundum feimið því þetta er svo frjálst en þetta er bara yndislegt. Það geta í raun allir dansað 5Rytma dans en hver og einn fylgir sínum eigin takmörkunum,“ segir Annska.

Dansað um allt land

Einn virtasti og vinsælasti 5Rytma danskennari heims, Alain Allard, hefur komið reglulega til Íslands síðastliðin ár til að kenna. Hann heldur nú um helgina námskeið sem kallast Maps to Ecstasy. Sigurborg heldur opna tíma einu sinni í viku og Annska fyrsta fimmtudag í mánuði. Þeir tímar fara fram á Dansverkstæðinu á Skúlagötu. Þá kennir Annska fyrsta laugardag í mánuði á Akureyri og í bígerð er námskeið á Ísafirði. Annska mun einnig halda prufutíma á Dansverkstæðinu nú á mánudaginn klukkan 20.