Eftirlitið Starfsfólk Heilbrigðiseftirlitsins að störfum í Kosti í gær.
Eftirlitið Starfsfólk Heilbrigðiseftirlitsins að störfum í Kosti í gær. — Ljósmynd/Kostur
„Þetta er algjört einelti. Þetta er í áttunda sinn sem þetta fólk kemur í búðina okkar. Þetta er sóun á peningum skattgreiðenda.

„Þetta er algjört einelti. Þetta er í áttunda sinn sem þetta fólk kemur í búðina okkar. Þetta er sóun á peningum skattgreiðenda. Þeim væri betur varið í baráttu gegn sölu á eiturlyfjum en að athuga hvað er í Pringles-kartöfluflögum,“ sagði Jón Gerald Sullenberger, kaupmaður í Kosti, í tilefni af heimsókn starfsmanna Heilbrigðiseftirlitsins í verslunina í gær.

Jón Gerald getur sér til um að tilefni heimsóknarinnar sé heilsíðuauglýsing Kosts í Fréttatímanum í gær þar sem vörur frá Norður-Ameríku í versluninni voru auglýstar.

„Allt sem kemur frá Ameríku er bannað í augum eftirlitsins. Hvað heldur Heilbrigðiseftirlitið eiginlega að sé í vörum á borð við Skittles, Hershey's-súkkulaði, Twix eða On the border tortilla chips? Við erum að undirbúa verslunarmannahelgi og það sama gerist og fyrir síðustu jól að hingað mæta tveir fulltrúar frá eftirlitinu með möppu og fylla innkaupakörfu af vörum. Þeir eru að taka sýnishorn af þessu.

Sama taktík og fyrir jólin

Kannski er eftirlitið að fara í útilegu? Þetta er sama taktík og fyrir síðustu jól þegar þau mættu á Þorláksmessu. Hver er tilgangurinn? Það er ekki verið að kanna hvort hitastigið í kælunum sé í lagi – að hreint og fínt sé í kringum kjötið og grænmetið. Það er verið að fylla körfu af snakki og sælgæti. Ég á ekki aukatekið orð yfir þessu.

Matvælastofnun fær á hverju ári 1,2 milljarða af fé skattgreiðenda. Er verið að sóa þeim fjármunum í svona vitleysu?“ sagði Jón Gerald.

Fulltrúar Heilbrigðiseftirlits Hafnarfjarðar- og Kópavogssvæðis mættu í verslun Kosts á Dalvegi í gær, en Matvælastofnun fer einnig með yfirumsjón með matvælaeftirliti á vegum heilbrigðiseftirlits sveitarfélaga.

Guðmundur H. Einarsson, framkvæmdastjóri Heilbrigðiseftirlitsins, sagði alveg rétt hjá Jóni Gerald að eftirlitið hefði komið allt of oft í heimsókn til hans. Hann segir það hins vegar vera vegna skorts á innra eftirliti í versluninni með að matvælalögunum sé fylgt.

Guðmundur vísar í fundargerð Heilbrigðiseftirlitsins frá 24. júní. Þar kemur fram að ábending hafi borist eftirlitinu vegna vanmerktra og ólöglegra matvæla. „Fyrirtækið á að skila okkur áætlun um það hvernig þeir ætla að standa að eftirliti í sinni verslun. Þeir gera það ekki og þá komumst við ekkert lengra nema við gerum okkar eigin athuganir,“ sagði Guðmundur.