Vörður Leví Traustason
Vörður Leví Traustason
Eftir Vörð Leví Traustason: "Brýn nauðsyn er að fjölga innlagnarýmum vegna mikillar þarfar og eftirspurnar."

Markmið Samhjálpar er að veita bjargir þeim einstaklingum sem halloka hafa farið í lífinu, vegna sjúkdóma, fátæktar eða annarra samfélagslegra vandamála og með því stuðla að velferð og sjálfsbjörg þeirra.

Höfuðstöðvar samtakanna eru í Hlíðasmára 14, 3.h., 201 Kópavogi. Þar eru skrifstofur, göngudeild og úthringiver til húsa. Í Hlíðasmára fer hluti forvarna- og eftirmeðferðarstarfsins fram.

Samhjálp félagasamtök hafa starfað að góðgerðarmálum og hjálparstarfi í rúm fjörutíu ár með góðum árangri og allan þann tíma staðið vaktina fyrir þá aðila sem minna mega sín og hafa átt við áfengis- og vímuefnavanda að stríða.

Á vegum samtakanna eru rekin nokkur úrræði og ber fyrst að nefna meðferðaheimilið Hlaðgerðarkot í Mosfellsdal en þar eru að staðaldri um 30 einstaklingar í meðferð og að jafnaði eru 60 til 70 á biðlista.

Hlaðgerðarkot er meðferðarheimili en ekki sjúkrastofnun. Margir sem þangað leita hafa orð á því að þar ganga starfsmenn ekki um í hvítum sloppum heldur er þar heimilislegt og kærleikurinn er hafður að leiðarljósi.

Á síðustu árum hefur yngra fólk leitað í auknum mæli eftir meðferð í Hlaðgerðarkoti. Nú er svo komið að yfir 50% skjólstæðinga Hlaðgerðarkots eru á aldursbilinu 18 til 39 ára.

Því miður annar meðferðarheimilið ekki þeim mikla fjölda sem þangað leitar og því er nauðsynlegt að leysa þann vanda og byggja við og stækka meðferðarheimilið.

Árið 1974 keypti Samhjálp Hlaðgerðarkot af Mæðrastyrksnefnd Reykjavíkur og byrjaði rekstur meðferðarheimilis þar. En meðferðarstarf Samhjálpar byrjaði í bílskúr á Sogaveginum haustið 1972

Elsti hluti af húsakynnum Hlaðgerðarkots er kominn til ára sinna (eru frá árinu 1955) og þarfnast aukins viðhalds. Að fara í það stóra verkefni að byggja við Hlaðgerðarkot er viðamikil og kostnaðarsöm aðgerð. Því er fyrirhuguð landssöfnun á Stöð2 í opinni dagskrá laugardagskvöldið 21. nóvember nk. ætluð til stuðnings þess verkefnis. Brýn nauðsyn er að fjölga innlagnarýmum vegna mikillar þarfar og eftirspurnar. Fyrsti áfangi nýrrar byggingar verður þó aðeins til að bæta úr brýnni nauðsyn á húsakosti Hlaðgerðarkots.

Landssöfnun á Stöð2 21. nóvember

Samhjálp mun standa fyrir landssöfnun í samstarfi við 365 miðla ehf. og verður hún í beinni útsendingu laugardagskvöldið 21. nóvember á Stöð2 í opinni dagskrá.

Ýmsir tónlistarmenn og skemmtikraftar munu koma fram í þættinum og gefa þeir allir vinnu sína til styrktar málefninu. Þá munu einnig ýmsir skjólstæðingar, vinir og velunnarar Samhjálpar segja reynslusögur sínar á söfnunarkvöldinu. Hægt að leggja inn á söfnunarreikning „Hjálpaðu okkur að hjálpa öðrum“, banki: 0322-26-58000 kt. 5511730389. Einnig er hægt að nálgast nánari upplýsingar varðandi söfnunina á www.samhjalp.is

Eftirmeðferðar- og áfangahús

Samhjálp rekur einnig eftirmeðferðar- og áfangahúsin Brú, en þar eru 19 einstaklingsíbúðir og Spor þar sem 18 herbergi eru. Stuðningsheimilið á Miklubraut 18 er rekið samkvæmt samningi við Reykjavíkurborg.

Til þess að komast að í áfangahúsinu þurfa umsækjendur að hafa lokið meðferð í Hlaðgerðarkoti eða á öðrum meðferðarstofnunum. Þeir þurfa að ráða sig í starf að lágmarki 4 vikum eftir að þeir flytja inn eða skrá sig í nám eða endurhæfingarúrræði. Markmið þeirrar félagslegu aðhlynningar sem veitt er á áfangaheimilunum er að gera skjólstæðingum kleift að temja sér nýja lífshætti og varanlegt bindindi á eigin ábyrgð. Íbúum er skylt að sækja AA fundi og viðtöl hjá ráðgjafa á göngudeild Samhjálpar.

Þeir sem koma inn á Spor eru gjarnan að koma úr meðferð en það er þó ekki skilyrði fyrir búsetu þar, menn verða þó að hafa verið edrú í að minnsta kosti tvær vikur fyrir komuna þangað. Íbúar Spors eru skyldugir til að sækja dagskrá sem felur m.a. í sér morgunfundi fjórum sinnum í viku og einn AA fund. Að auki er íbúum boðið upp á einkaviðtöl eftir þörfum á göngudeild Samhjálpar.

Kaffistofa Samhjálpar

Ekki má gleyma Kaffistofu Samhjálpar í Borgartúni 1. Þar er boðið upp á morgunkaffi, meðlæti og heita máltíð um kl. 13.30, alla daga ársins, helgar jafnt sem helgidaga.

Matargestir eru að jafnaði 180 á dag allt árið um kring. Á síðasta ári gaf Samhjálp yfir 65 þúsund máltíðir á Kaffistofunni.

Rekstur Samhjálpar væri ekki mögulegur ef ekki kæmu til styrkir og gjafir frá fyrirtækjum, félagasamtökum og einstaklingum. Færi ég undirritaður öllum sem lagt hafa þessu góða málefni lið bestu þakkir.

Höfundur er framkvæmdastjóri Samhjálpar.