Berjast gegn úrsögn Sir John Major og Tony Blair ganga yfir Friðarbrúna í Derry á Norður-Írlandi í gær þegar þeir fóru þangað í heimsókn.
Berjast gegn úrsögn Sir John Major og Tony Blair ganga yfir Friðarbrúna í Derry á Norður-Írlandi í gær þegar þeir fóru þangað í heimsókn. — AFP
[ Smellið til að sjá stærri mynd ]
Bogi Þór Arason bogi@mbl.is Sir John Major og Tony Blair, fyrrverandi forsætisráðherrar Bretlands, vöruðu í gær við því að úrsögn landsins úr Evrópusambandinu, Brexit, myndi „ógna einingu Bretlands“ og grafa undan friði á Norður-Írlandi.

Bogi Þór Arason

bogi@mbl.is

Sir John Major og Tony Blair, fyrrverandi forsætisráðherrar Bretlands, vöruðu í gær við því að úrsögn landsins úr Evrópusambandinu, Brexit, myndi „ógna einingu Bretlands“ og grafa undan friði á Norður-Írlandi.

Sir John og Blair heimsóttu Norður-Írland tveimur vikum fyrir þjóðaratkvæðagreiðslu um aðild Bretlands að ESB og sögðu að eining landsins væri í veði í þjóðaratkvæðinu. Sir John sagði að „alvarleg hætta“ væri á nýrri þjóðaratkvæðagreiðslu í Skotlandi um sjálfstæði frá Bretlandi og hann taldi líklegt að skoskir aðskilnaðarsinnar færu þá með sigur af hólmi ef Bretar gengju úr ESB en meirihluti Skota væri hlynntur aðild að sambandinu.

Sir John var forsætisráðherra stjórnar Íhaldsflokksins á árunum 1990 til 1997 en Blair fór fyrir stjórn Verkamannaflokksins 1997 til 2007. Þeir gegndu mikilvægu hlutverki í viðræðum sem leiddu til friðarsamnings á Norður-Írlandi árið 1998.

Forsætisráðherrarnir fyrrverandi sögðu í heimsókninni í gær að úrsögn Bretlands úr ESB myndi stefna hagsæld og „framtíð Norður-Írlands“ í hættu með því að grafa undan friðinum. Bill Clinton, fyrrverandi forseti Bandaríkjanna, hélt því sama fram í grein sem birt var í tímaritinu New Statesman .

„Mjög ábyrgðarlaust“

Theresa Villiers, Norður-Írlandsmálaráðherra ríkisstjórnar breska Íhaldsflokksins, hafnaði þessari viðvörun í gær. Villiers, sem er hlynnt úrsögn Bretlands úr ESB, sagði að stuðningur Norður-Íra við friðarsamkomulagið væri „bjargtraustur“. „Það verður ekki afturhvarf til ófriðar fortíðarinnar á Norður-Írlandi, hver sem niðurstaða þjóðaratkvæðisins verður, og að halda öðru fram væri mjög ábyrgðarlaust,“ sagði ráðherrann.