ATLI Eðvaldsson, landsliðsþjálfari í knattspyrnu, lék báða þá landsleiki sem Íslendingar hafa leikið við Pólverja og eftir leikinn í dag verður hann eini Íslendingurinn sem hefur komið að öllum þremur landsleikjum þjóðanna.
Atli segist renna nokkuð blint í sjóinn með leik Pólverja enda hafi þjálfari liðsins notað mikið af leikmönnum að undanförnu og því sé ef til vill ekki mikið að græða á þeim myndböndum sem hann hafi skoðað.

"Ég vona bara að leikurinn verði ekki eins og leikurinn sem við töpuðum hér 2:0 fyrir 21 ári. Þá vorum við undir pressu í einar 80 mínútur ef ég man rétt, vonandi gengur okkur betur núna," sagði Atli. Hann sagðist einkum hugsa leikinn í dag sem góða æfingu fyrir leikinn við Búlgara í Evrópukeppninni.

"Pólski þjálfarinn er með 18 menn á listanum hjá sér en við erum með sextán og það var búið að ræða um að við mættum nota alla þá leikmenn sem við erum með þannig að ég á von á að bæði lið nýti sér það enda eru æfinga- og vináttuleikir einkanlega hugsaðir til að liðin geti búið sig undir eitthvað sem skiptir meira máli," sagði Atli.

Við höfum lent í vandræðum með lið frá austurhluta Evrópu, kannt þú einhverjar skýringar á hvers vegna það er?

"Já, það er rétt að við höfum alltaf átt í mestu vandræðum á móti þeim þjóðum og ég veit ekki hver skýringin er, kannski gæti hún verið að þessi lið eru ekki með eins fræga menn og mörg önnur lið sem við höfum leikið við í gegnum tíðina. Við þetta gæti hugsast að það náist ekki upp rétta stemmningin eins og fyrir leiki við frægari leikmenn. Við gerðum jafntefli í Tyrklandi um árið og Tyrkir unnu Austur-Þjóðverja þrjú eða fjögur núll í Austur-Þýskalandi. Svo komum við til Austur-Þýskalands og töpuðum 2:0 og áttum ekki nokkra möguleika. Pólverjar áttu einu sinni Boniek og Lado og þá alla en kannski er þetta eitthvað landlægt hjá okkur að því fleiri fræg nöfn sem eru á listanum því betur gengur okkur að ná upp stemmningu." Atli sagðist ekki ætla að leggja út í miklar breytingar á leikskipulagi.

"Það hefur sýnt sig, held ég, að kerfið sem slíkt virkar ágætlega, en við verðum að láta menn finna fyrir okkur í upphafi leiks þannig að þeir geri sér ljóst að þeir rúlla ekkert yfir okkur. Lið frá Austur-Evrópu spila svipað og við höfum átt í erfiðleikum með þau. Líklegt er að Pólverjar leiki snaggaralegt þríhyrningaspil með löngum skiptingum og á móti Wales um daginn reyndu þeir mikið að senda á milli bakvarðar og miðvarðar og komast þannig í gegn. Þjálfarinn er búinn að nota rúmlega 30 leikmenn síðustu mánuði og er enn að bæta við þannig að mér finnst við ekki þekkja þá nóg til að fara að aðlaga leik okkar að þeim. Ef við náum að leika eins og við viljum leika, með gríðarlega mikilli hreyfingu í vörninni og snöggum sóknum, þá vonast ég til að við stöndum okkur vel, en að sjálfsögðu verður þetta erfiður leikur. Við munum gera okkar besta til að fá það út úr honum sem við viljum. Þetta er einkum og sér í lagi æfingaleikur fyrir liðið," sagði landsliðsþjálfarinn.

Skúli Unnar Sveinsson skrifar frá Póllandi