YFIRLEITT eru það ekki góð vísindi að leggja niður óstuddan ás í útspili gegn geimsamningi, því "ásar eru til að drepa kónga, en ekki til að veiða tvista og þrista". En allt á sinn tíma.

YFIRLEITT eru það ekki góð vísindi að leggja niður óstuddan ás í útspili gegn geimsamningi, því "ásar eru til að drepa kónga, en ekki til að veiða tvista og þrista". En allt á sinn tíma. Sigurbjörn Haraldsson var vakandi fyrir rétta tímanum til að spila út ás frá Áxx. Spilið kom upp á landsliðsæfingu um síðustu helgi:

Vestur gefur; NS á hættu.

Norður
KG1043
75
107
ÁK32
Vestur Austur
Á75 862
KG4 10
862 Á943
G1084 D9765
Suður
D9
ÁD98632
KDG5
--

Feðgarnir Karl Sigurhjartarson og Snorri Karlsson voru í NS, Sigurbjörn í vestur og bróðir hans Anton í austur. Brids er fjölskylduspil. Sagnir gengu:

Vestur Norður Austur Suður
Sigurbjörn Snorri Anton Karl
1 grand * Pass Pass 4 hjörtu
Pass Pass Pass

* 9-12 punktar.

Bræðurnir spila svokallað "minigrand" á þessum hættum (utan hættu gegn á), en Karl lét það ekki trufla sig og stökk beint í fjögur hjörtu.

Útspilsbækur mæla með laufgosa frá vesturhendinni. Afleiðingin af því er augljós: Sagnhafi hendir tveimur spöðum niður í ÁK í laufi og vinnur sitt spil.

Sigurbjörn kom hins vegar út með spaðaásinn. Útspilið er mjög rökrétt í samhenginu. Vestur horfir á þrjá slagi og þarf aðeins einn frá makker. Hann veit að sagnhafi er með mikla skiptingu og vafalítið einspil eða eyðu í einhverjum lit. Því er þýðingarmikið að taka strax sitt og nota janframt frumkvæðið sem vörnin hefur með útspilinu til hins ýtrasta.

Anton vísaði spaðanum frá og Sigurbjörn spilaði tígli í öðrum slag: Einn niður áður en sagnhafi komst að.