2. apríl 2004 | Fólk í fréttum | 401 orð | 1 mynd

SJÓNVARP - Sjónvarpið

Látið sem ekkert sé

...AND BJÖRK OF COURSE **½

"Viðfangsefnið stendur af sér storma og hríðir dogme-tökunnar...", segir í umsögn um ...and Björk of Course.
"Viðfangsefnið stendur af sér storma og hríðir dogme-tökunnar...", segir í umsögn um ...and Björk of Course.
Íslensk sjónvarpsmynd. Leikstjórar: Lárus Ýmir Óskarsson og Benedikt Erlingsson. Handrit: Lárus Ýmir Óskarsson og Þorvaldur Þorsteinsson, byggt á samnefndu leikriti þess síðarnefnda. Tónlist: Barði Jóhannsson, Ludwig van Beethoven.
Íslensk sjónvarpsmynd. Leikstjórar: Lárus Ýmir Óskarsson og Benedikt Erlingsson. Handrit: Lárus Ýmir Óskarsson og Þorvaldur Þorsteinsson, byggt á samnefndu leikriti þess síðarnefnda. Tónlist: Barði Jóhannsson, Ludwig van Beethoven. Klipping: Lárus Ýmir Óskarsson. Kvikmyndataka: Páll Reynisson o.fl. Hljóðupptaka: Einar Sigurðsson. Hjóðsetning: Uss ehf. Aðalleikendur: Gunnar Hansson, Halldór Gylfason, Harpa Arnardóttir, Katla Margrét Þorgeirsdóttir, Sigrún Edda Björnsdóttir, Sóley Elíasdóttir og Þór Tulinius. Sýningartími um 120 mín. Borgarleikhúsið. RÚV 28. mars 2004.

UNDIR greinilegri uppörvun frá Thomas Vinterberg hefur verið ráðist í sjónvarpsmyndargerð leikritsins And Björk of Course, sem Borgarleikhúsið frumsýndi fyrir nokkrum árum við góðar undirtektir áhorfenda og gagnrýnenda. Myndgerðin er í dogmestíl, undir stjórn Lárusar Ýmis Óskarssonar og leikhúsmannsins Benedikts Erlingssonar, sem jafnframt stýrði verkinu á sviði.

And Björk of Course segir af sex manna hópi einstaklinga sem sækja sjálfskönnunarnámskeið hjá leiðbeinanda (Harpa Arnardóttir) sem starfar í anda bandarísks tískugúrús - fer með hópinn sinn í afvikið hús og þar úti í guðsgrænni náttúrunni á fólkið að moka sinn andlega flór. Finna sjálft sig, ráða bót á vandamálum sálarinnar, sem reynast ólík og af misjafnlega alvarlegum toga. "Programmet" er tekið upp á myndband sem áhorfandinn síðan nýtur.

Ýmislegt kraumar undir yfirborðinu, þátttakendurnir eru flestir orðnir listamenn í að láta sem ekkert sé, sama á hverju gengur. Halda haus, fela ósómann undir snyrtilegri hversdagsímynd.

Þetta er lífið og tilveran í kringum okkur í ýktri mynd. Það vill brenna við að því betur sem við kynnumst kárnar gamanið, á þeim nótum er framvinda myndarinnar, kaldhæðinn tónninn breytist smám saman í grafalvarlega ádeilu. Niðurstaðan eftir margvíslegar og óvæntar afhjúpanir og að lokum náttúruhamfarir er sláandi: persónurnar eru á sömu slóðum og í upphafi.

Kostirnir við sjónvarpsmyndina eru frábærir sprettir og undirliggjandi ádeilan í texta Þorvaldar Þorsteinssonar, eins athyglisverðasta rithöfundar þjóðarinnar. Viðfangsefnið stendur af sér storma og hríðir dogme-tökunnar sem því miður varpar oftar en ekki athyglinni á dreif og fjarlægir áhorfandann frá taugakerfi verksins, deiglu atburðanna. Myndin er því tvískipt að gæðum. Annars vegar þessi mergjaði texti, leiftrandi skopskyn, blandað ádeilu á faríseann í okkur, tillitsleysið og tómlætið sem ríkir í mannlegum samskiptum; innantómar patentlausnir og frasar stjórnendanna. Frábær leikur þar sem hópurinn fær eina heildar ágætiseinkunn og fer undantekningarlaust á kostum undir krefjandi stjórn Benedikts Erlingssonar.

Á hinn bóginn fær kvikmyndagerðin mann til að sakna dramatísks andrúms leikhússins.Takan (ekki síst utan dyra), á það til að tvístra spennunni í loftinu, brjóta upp einbeitinguna og hljóðupptakan, hvað sem öllum dogmereglum viðvíkur, skilar ekki á köflum talinu nægilega skýrt.

Sæbjörn Valdimarsson

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.