Hinn virti veitingastaður Louis XV, sem ber þrjár Michelin-stjörnur, er daglegur viðkomustaður þotuliðsins í Mónakó. Veitingastaðurinn er gimsteinn glæsihótelsins Hôtel de Paris Monte-Carlo í hjarta Carré d'Or á Casino de Monte-Carlo-torginu. Louis XV býður upp á eina bestu matarupplifun á Rívíerunni og jafnframt í heiminum. Ofurstjörnukokkurinn Alain Ducasse hefur umsjón með fágaðri matargerð veitingastaðarins. Réttirnir eru innblásnir af Rívíerunni og býður veitingastaðurinn upp á svæðisbundið hráefni, ilm og liti sem endurspegla franska matarmenningu, Miðjarðarhafsbragð, kryddjurtir og grænmeti af svæðinu.
Hôtel de Paris við Place du Casino er umkringt Ferrari-, Porsche- og Bentley-bifreiðum allan liðlangan daginn og veitingastaðurinn sjálfur minnir á Versali. Þjónustan á Louis XV er algjörlega óaðfinnanleg. Hyggist þú leggja leið þína á prívatið þá þjóta þrír þjónar strax að borðinu þínu. Einn mun hjálpa þér með stólinn, annar mun vísa þér veginn og sá þriðji tekur við tauservíettu þinni. Það má líka búast við litlum kolli fyrir handtösku frúarinnar og gullhúðaðri skál fylltri með ilmandi vatni til að þrífa hendurnar fyrir eftirréttinn.
Le Louis XV er sannarlega töfrandi veitingastaður með vínlista sem vekur hrifningu allra þeirra sem þekkja eitthvað til eðalvína. Vínkjallarinn undir Place du Casino og Hôtel de Paris geyma um það bil 560.000 flöskur sem innihalda allt það sem þú getur kallað eðalvín og gott úrval af glæsilegustu vínum í heimi. Brauðvagninn er meira segja fullkomið bakarí sem fullnægir nánast hvaða bragðkröfum sem er og ostavagninn hefur eitt besta úrval osta sem völ er á í heiminum. Upplifun á Louis XV yrði að öllum líkindum ógleymanleg. „Bon appétit.“