Matur | mbl | 30.11.2023 | 14:00 | Uppfært 1.12.2023 14:58

Spaghettí carbonara er ekta fimmtudagsréttur

Klassískur og góður spaghettí carbonara réttur sem steinliggur. Ljósmynd/Hildur Rut

Er ekki upplagt að skella í dýrindis spaghettí carbonara á fimmtudagskvöldi sem tekur enga stund að útbúa og er syndsamlega ljúffengt? Þessi uppskrift inniheldur fá en góð hráefni og kemur úr smiðju Hildar Rutar Ingimarsdóttur sem heldur úti matarbloggi á heimasíðu Trendnet.is. Þetta er klassískur réttur sem klikkar ekki. Það er svo dásamlegt að fá sér frískandu búbblur í glas og bera réttinn fram með salati og hvítlauksbrauði. Það steinliggur á þessum tíma árs þegar mikið er að gera hjá öllum og lítill tími fyrir eldamennsku.

Spaghettí carbonara

Fyrir fjóra

350 g spaghetti frá De Cecco
1 msk. ólífuolía
270 g beikonsneiðar
2 msk. smjör
2 hvítlauksrif
4 eggjarauður
2 dl rifinn parmesan ostur + meira til að toppa með
½ -1 dl steinselja, smátt skorin
Salt og pipar
Pastavatn eftir smekk

Aðferð:

Byrjið á því að skera beikon smátt, aðskilja eggjarauðurnar frá eggjahvítunum, rífa parmesanostinn og skerja steinseljuna.
Gott að hafa allt tilbúið áður en þið sjóðið spaghettí.
Sjóðið spaghetti eftir leiðbeiningum á pakkningu með smá salti í vatninu.
Steikið beikon upp úr 1 msk. ólífuolíu þar til það verður stökkt.
Lækkið í hitanum og bætið smjöri saman við.
Hrærið saman eggjarauðum, parmesan osti, steinselju, salti og pipar í skál.
Bætið pastavatni saman við til að þynna sósuna eftir smekk en passið að vatnið sé ekki bullsjóðandi (við viljum ekki að eggin eldist).
Bætið spaghettísaman við beikonið á pönnunni og hrærið saman.
Takið pönnuna alveg af hellunni og blandið eggjablöndunni saman við.
Það er mikilvægt að hafa ekki hita undir pönnunni þannig að eggin eldist ekki.
Í lokin rífið niður parmesanost og skerið steinselju smátt, dreifið yfir réttinn og njótið.