Matur | mbl | 10.1.2024 | 11:00 | Uppfært 11:30

Þorskhnakkar með graskers- og basilpestó að hætti Jönu

Þorskhnakkar með graskers- og basilpestó er kærkominn fiskréttur til að njóta í janúar. Samsett mynd

Hér er á ferðinni mjög auðveldur og bragðgóður fiskréttur, er kemur úr smiðju Kristjönu Steingrímsdóttur heilsumarkþjálfa, sem þú munt vilja gera aftur og aftur. Þetta eru þorskhnakkar bakaðir með graskers- og basilpestói sem bragðast guðdómlega vel saman. Kristjana er betur þekkt undir nafninu Jana og hægt er að fylgjast með henni og því sem hún töfrar fram reglulega á Instagram-síðunni hennar hér.

Þorskhnakkar með graskers- og basilpestó

700 g ferskir þorskhnakkar
Graskers- og basilpestó (sjá uppskrift hér fyrir neðan)

Aðferð:

Hitið ofninn í 180°C hita.
Setjið þorskhnakkana í eldfast mót.
Dreifið hluta af graskers- og basilpestóinu yfir þorskinn.
Saltið og piprið og kreistið smá af ferskri sítrónu yfir.
Bakið inn í ofni í um það bil 18 mínútur.
Berið fram með fersku salati, bökuðu grænmeti og jafnvel kartöflum eða hrísgrjónum og svo afganginum af pestóinu til að toppa allt saman.

Graskers- og basilpestó

½ bolli graskersfræ
20 g ferskt basil (1 box)
10 g fersk steinselja (½ box)
1 hvítlauksrif, afhýtt
½ sítróna, safinn
Smá salt og pipar
250 ml eða um 1 bolli, ólífuolía
4 msk. rifinn parmesanostur (má sleppa)

Aðferð:

Blandið öllu nema olíunni og parmesanostinum saman í matvinnsluvél eða með töfrasprota. Hellið svo smám saman olíunni út í blönduna og blandið rólega saman.
Hrærið svo að lokum parmesanostinum út í með skeið, ef þið ætlið að nota hann, sem gerir alveg extra ljúft pestó.