Kristjana Steingrímsdóttir, alla jafna kölluð, Jana, er óstöðvandi í eldhúsinu að þróa heilsurétti. Ástríða hennar fyrir hollum og góðum réttum sést þegar Instagram-síðan hennar er skoðuð. Nýjasta afurðin hennar er þetta dásamlega frækex sem hún kallar frækex-pitsur. Ótrúlega ljúffengt og hægt er að leika sér með áleggið ofan á kexið og velja það sem hverjum og einum finnst best. Hægt er að sjá hvernig Jana býr frækexið til hér fyrir neðan á Instagram-færslunni hennar.
Frækex „pitsur“ með pestó, grænmeti og ávöxtum
- 1 ½ bolli hörfræ
- 1 bolli af sesamfræjum
- ½ bolli graskersfræ
- ½ bolli af sólblómafræjum
- ½ bolli af fínt sneiðum möndlum eða möndluduft
- 2 msk. Mexíkaninn ( Frá Kryddhúsinu )
- 1 msk. óreganó
- 1 tsk. hvítlauksduft
- 1 tsk. sjávarsalt
- Smá cayenne pipar eða svartur pipar
- 2 bollar vatn eða um það bil
Aðferð:
- Blandið öllu hráefninu vel saman í skál og látið bíða í 2-3 klukkustund eða þar til að blandan er vel klístruð saman.
- Hörfræin binda allt saman.
- Takið næst blönduna og þrýstið deiginu á ofnplötu klædda bökunarpappír, Jana notar alltaf auka bökunarpappír til að þrýsta deiginu vel niður og fá sem þynnsta kexið.
- Bakið eða þurrkið í ofni við 160°C hita í allt að 40 mínútur eða þar til kexið hefur þornað.
- Takið stöðuna á kexinu reglulega og það gæti verið sniðugt að snúa því við eftir um það bil 30 mínútur.
- Það má gjarnan leika sér með kryddin í þessu kexi eftir smekk hvers og eins.
- Berið fram með pestó, grænmeti og ávöxtum að eigin vali.