Vilja sannanir fyrir virkni húðvörunnar

Jenna Huld Eysteinsdóttir, húðlæknir á Húðlæknastöðinni, segist vera að svara eftirspurn sjúklinga sinna og auka þjónustu í fegrunaraðgerðum með þessum nýju snyrtivörum.

„Til að ná hámarksárangri af öllum fegrunarmeðferðum þá er mikilvægt að nota réttu húðvörurnar heima fyrir og eftir meðferðirnar. Það eru þá húðvörur með virkum efnum, eins og til dæmis retinóíðum, og sem hafa gengið í gegnum sama gæðaferli og lyf með vönduðum klínískum rannsóknum sem sýna fram á virkni þeirra. Svona húðvörur eru það sem er kallað „Cosmoceuticals“ eða MD-húðvörur, þar sem MD stendur fyrir Medical Doctor, og eru í raun á milli þess að vera lyf og snyrtivörur. Þar sem MD-línur innihalda virk efni eru þær yfirleitt einungis seldar á viðurkenndum húðlæknastofum,“ segir Jenna Huld Eysteinsdóttir, húðlæknir á Húðlæknastöðinni, en nýverið hófu húðlæknar þar sölu á hinu eftirsótta húðumhirðumerki SkinCeuticals. Með þessu segir Jenna Huld Húðlæknastöðina vera að svara eftirspurn sjúklinga sinna og auka þjónustuna í fegrunarmeðferðunum hjá þeim.

„Á Húðlæknastöðinni starfa 10 húðlæknar og það þekkja margir húðlækningahlutann af starfseminni hjá okkur en margir vita ekki af því að við erum með stóra lýtahúðlækningadeild þar sem við bjóðum upp á medical peel, dermapen, lasermeðferðir, fylliefni, botox og fleira.“

Vildu rannsóknir sem sanna virknina

SkinCeuticals-húðvörurnar þróast út frá brautryðjandi rannsóknum bandaríska húðlæknisins Sheldon Pinnell á verndandi þætti andoxunarefnisins C-vítamíns á húðkrabbamein og eru andoxunarefni aðalsmerki húðvaranna.

„Þar sem við erum húðlæknar vildum við MD-línu sem legði áherslu á fagleg vinnubrögð og væru með klínískar rannsóknir á bak við sig til að sanna virkni varanna. Andoxunar-húðvörur þeirra eru mjög vel rannsakaðar og háþróaðar og það eru í raun þær sem gera þetta merki frábrugðið öðrum MD-húðvörulínum. Einnig heilluðumst við af einfaldri, heildrænni og einstaklingsmiðaðri nálgun SkinCeuticals á húðumhirðu,“ segir Jenna Huld en SkinCeuticals flokkar vörur sínar í þrennt, þ.e.a.s. fyrirbyggjandi (e. Prevent), verndandi (e. Protect) og svo uppbyggjandi (e. Correct).

Jenna Huld segir þessa nálgun henta húðlæknum mjög vel þar sem þeir vinni mikið með öldrun húðarinnar dagsdaglega og leiðbeina sjúklingum sínum hvernig eigi að fyrirbyggja ýmsa húðkvilla og vernda húðina. „Svo eru alltaf einhverjir sem hafa áhuga á að byggja húðina upp og draga úr fínum línum og auka þéttleikann og þá leiðbeinum við þeim hvernig það er hægt, bæði með virkum húðvörum og svo meira sérhæfðum meðferðum eins og t.d. laser,“ bætir hún við.

Tók mörg ár að þróa dropana

Eins og komið hefur eru andoxunarefni einkennandi fyrir húðvörur SkinCeuticals en af hverju ætli það sé?

„Sólarvörnin ver okkur gegn útfjólubláum geislum sólarinnar, aðallega B-geislum (UVB) en einnig A-geislum (UVA) að einhverju leyti. Þær verja okkur aftur á móti ekkert gegn innrauðum geislum sólarinnar né gegn sindurefnum sem losna frá umhverfismengun o.fl. Það gera aftur á móti andoxunarefni og þau verja okkur líka að hluta gegn útfjólubláum geislum sólarinnar og bæta þannig áhrif sólarvarna,“ segir Jenna Huld en fyrsta húðvara SkinCeuticals og jafnframt sú þekktasta er C E Ferulic-droparnir sem samsettir eru af þremur kröftugum andoxunarefnum; C-vítamíni, E-vítamíni og Ferulic-sýru sem unnin er úr hveiti.

„C E Ferulic-droparnir hafa sýnt fram á það í klínískum rannsóknum að þeir veita ekki einungis vörn gegn útfjólubláum og innrauðum geislum sólarinnar og sindurefnum umhverfisins, heldur örva þeir einnig nýmyndun kollagens og minnka þannig fínar línur á húðinni og auka þéttleika hennar og gljáa. Það tók mörg ár að þróa þessa dropa þar sem erfitt getur reynst að koma virku efnunum í gegnum húðina án þess að þau tapi virkni sinni. En það tókst og er þessi húðvara sú allra vinsælasta hjá þeim frá upphafi og hentar öllum húðgerðum,“ segir Jenna Huld.

Fjögur andoxunarefni hafa sannað gildi sitt

C-vítamín er eitt öflugasta innihaldsefnið í húðvörum og var fyrsta andoxunarefnið til að sýna fram á virkni sína en það var einmitt dr. Sheldon Pinnell, faðir SkinCeuticals, sem uppgötvaði virkni þess á húðina.

„Það eru í raun fjögur andoxunarefni sem hafa sannað gildi sitt í klínískum rannsóknum og það eru einmitt C-vítamín, E-vítamín, Ferulic-sýra og Phloretin sem er unnið úr eplum. Allt C-vítamín er svo ekki C-vítamín því það getur verið verulegur gæðamunur á því í vörum eins og með öll önnur efni. Einnig þarf að vera visst sýrugildi til staðar og hjálparefni í húðvörunum til að C-vítamínið komist raunverulega gegnum húðina þar sem við viljum að það virki. Það er ekkert gæðaeftirlit á snyrtivörum sem er auðvitað bagalegt fyrir okkur kúnnana því í rauninni vitum við ekki hvort þessi efni, sem eru skrifuð utan á túpuna, séu raunverulega til staðar í vörunum eða ekki,“ bendir Jenna Huld á en aldrei hafa húðvörur verið jafnvinsælar en tæknilegri og virkari formúlur eru nú aðgengilegri almenningi en oft áður.

Hafa farið illa vegna þekkingarleysis á virkum efnum

Á markaðinn streyma virkar húðvörur og ýmsar staðhæfingar framleiðenda hafðar í frammi og halda margir að því meira sem formúlan inniheldur af virkum efnum því betri verði árangurinn. Jenna Huld segist hafa fengið til sín sjúklinga sem hafa farið ansi illa út úr slíku.

„Ég myndi ráðleggja þeim sem hafa áhuga á að nota svona virkar húðvörur að fá álit húðlæknis fyrst; hvaða húðgerð er ég og þoli ég þessi efni? Það eru ekki allir sem þola retinóíðana eða ávaxtasýrurnar, t.d. þeir sem eru með viðkvæma húð og rósroða. Einnig er mjög mikilvægt að trappa notkun þessara efna hægt upp svo húðin fái tíma til að venjast efnunum,“ segir hún. En hvað er það besta sem við getum gert til að halda unglegri ásýnd sem lengst? „Sólarvörn, sólarvörn, sólarvörn! Við húðlæknar ætlumst ekki til þess að fólk haldi sig inni en verum skynsöm. Rannsóknir hafa sýnt að við fáum nægjanlegt D-vítamín eftir 15-20 mínútur í sólinni án sólarvarnar. Njótum þess að vera úti en klæðumst léttum fötum, verum í skugga þegar það er hægt og berum á okkur sólarvörn með minnst 30 í SPF-faktor á þau húðsvæði sem við getum ekki skýlt svo auðveldlega eins og andlit og handarbök. Þegar við erum komin á fertugsaldur getum við svo byrjað að hugsa um að nota fyrirbyggjandi virkar húðvörur með andoxunarefnum, ávaxtasýru eða retinóíðum. Einnig hafa rannsóknir sýnt fram á að lífsstíll skiptir máli varðandi öldrun húðarinnar, eins og streita, svefnleysi, reykingar og óhollur matur.“

Sérsniðnar leiðbeiningar

SkinCeuticals-vörurnar eru einungis seldar á húðlæknastofum eða stofum sem hafa starfandi húðlækna eða lýtalækna svo neytendur fái faglegt álit á því hvaða vörur henti þeim. „SkinCeuticals eru með sérsniðnar leiðbeiningar fyrir einstaklinga sem hafa rósroða eða viðkvæma húð; eru með unglingabólur; eru með feita húð; eru með fínar línur eða dýpri hrukkur og vilja koma í veg fyrir frekari öldrun húðarinnar o.s.frv.,“ og segir Jenna Huld að allir séu velkomnir á Húðlæknastöðina á Smáratorgi 1 í ókeypis ráðgjöf um húðvörurnar.