Tæklingar, gæði og læti

Stefan Ljubicic í leik með HK.
Stefan Ljubicic í leik með HK. mbl.is/Eggert Jóhannesson

„Við mættum til leiks og vorum helvíti góðir þangað til þeir skora jöfnunarmarkið,“ sagði Stefan Alexander Ljubicic, framherji HK, í samtali við mbl.is eftir 2:3-tap fyrir Breiðabliki í Pepsi Max-deildinni í fótbolta í kvöld.

Þrátt fyrir tapið var Stefan ánægður með margt í leik HK í kvöld. „Það var kraftur í okkur, tæklingar, gæði og læti. Við gerðum það sem lögðum upp með að gera, það virkaði þangað til í endann þegar við missum hausinn. Heilt yfir getum við verið ánægðir með frammistöðuna.“

HK komst yfir með marki úr víti í seinni hálfleik en Breiðablik jafnaði úr öðru slíku.

„Hjá okkur var Martin fyrstur í boltann og það var farið í bakið á honum. Mér fannst það vera víti. Ég sá ekki vítið sem þeir fengu, það var fast skot af stuttu færi, en sennilega voru báðir dómar réttir,“ sagði Stefan.

mbl.is