Íþróttir | Íslenski fótboltinn | mbl | 4.7.2023 | 20:31 | Uppfært 22:40

Vítakeppni og stáltaugar komu KA í bikarúrslitin

Leikmenn KA fagna eftir að sigurinn var í höfn. Ljósmynd/Kristín Hallgrímsdóttir

Það var hart barist á KA-vellinum á Akureyri í dag þegar KA og Breiðablik mættust í undanúrslitum Mjólkurbikars karla.

Bæði lið höfðu tapað í undanúrslitum í fyrra og það átti greinilega ekki að koma fyrir aftur. Í bikarkeppni er það þó alltaf þannig að aðeins annað liðið kemst áfram.

Eftir tvo klukkutíma af fótbolta og rúmlega það, þar sem staðan var 2:2 eftir venjulegan leiktíma og 3:3 eftir framlengingu voru það heimamenn í KA sem stóðu uppi sem sigurvegarar í dramatískri vítaspyrnukeppni og þeir leika til úrslita um bikarinn í fjórða skipti, gegn annað hvort Víkingi eða KR.

Breiðablik byrjaði leikinn af miklum krafti og KA átti í vök að verjast fyrsta kortérið. Léttleikandi spil og snerpa skilaði Blikum í góðar stöður nokkrum sinnum en illa gekk að skapa dauðafæri. KA-menn stóðu vaktina nokkuð vel inni í teig og Kristijan Jajalo þurfti að grípa inn í nokkrum sinnum.

Anton Ari Einarsson grípur boltann í leiknum í dag. Ljósmynd/Kristín Hallgrímsdóttir

Jason Daði Svanþórsson, Höskuldur Gunnlaugsson og Viktor Karl Einarsson voru allt í öllu í sóknaruppbyggingu Blika en bakverðirnir Andri Rafn Yeoman og Arnór Sveinn Aðalsteinsson voru líka stórhættulegir.

KA-menn náðu fínum kafla um miðbik fyrri hálfleiks en bitið í sókn þeirra var lítið. Það sem helst vakti athygli í leik KA voru lélegar hreinsanir þar sem leikmenn hreinlega hittu boltann illa eða bara alls ekki.

Þessi smáatriði hefðu getað kostað heimamenn en þeir komust upp með þetta í fyrri hálfleiknum. Blikar blésu aftur til sóknar undir lok fyrri hálfleiks en allt kom fyrir ekki. Staðan var 0:0 í hálfleik.

KA byrjaði seinni hálfleikinn betur en Breiðablik og gaf tóninn fyrir framhaldið. Nokkuð jafnræði var svo með liðunum þar til KA skoraði fyrsta mark leiksins. Var vel að því staðið. KA-menn prjónuðu sig í gegn inni í vítateig Blika og Jakob Snær náði föstu skoti á markið. Anton Ari Einarsson varið vel en boltinn skoppaði flaug út í teiginn. Ásgeir Sigurgeirsson var fyrstur í boltann og var ekki í vandræðum með að koma honum í netið.

KA var svo með 1:0 stöðu fram á lokamínúturnar. Breiðablik jafnaði leikinn á 86. mínútu eftir þunga pressu. Þá skoraði Klæmint Olsen með skalla en boltinn fór í stöng og inn, 1:1.

Ívar Örn Árnason sækir að Viktori Karli Einarssyni. Ljósmynd/Kristín Hallgrímsdóttir

Það sem flestir sáu sem sigurmark Breiðabliks kom svo í uppbótartíma en það skoraði Höskuldur Gunnlaugsson úr aukaspyrnu, sem KA-menn voru ekki sáttir með.Skömmu fyrir jöfnunarmark Blika átti Hallgrímur Mar Steingrímsson skot í markstöngina og KA-menn voru allt í einu lentir undir, 1:2.

Á síðustu andartökum leiksins fékk KA hornspyrnu og eftir hana kom mark. Ívar Örn Árnason náði að jafna leikinn, 2:2, og þá þurfti framlengingu.

Dramatíkin var ekki búin og eftir rólegar fyrri hálfleik framlengingar fékk Breiðablik ansi ódýrt víti þegar Pætur Petersen var dæmdur brotlegur við vítateigslínuna. Höskuldur Gunnlaugsson steig á punktinn og skoraði, 2:3.

KA-menn voru hreinlega brjálaðir yfir dómi Ívars Orra en þeir höfðu kortér til að kvitta og koma sér í úrslitaleikinn.

Leið nú og beið og virtust Blikar ætla að innbyrða sigurinn án teljandi vandræða. KA gafst ekki upp og á 117. mínútu dúkkaði Pætur Petersen aftur upp og nú jafnaði hann leikinn með góðum skalla.

Þorri Mar Þórisson og Arnór Sveinn Aðalsteinsson takast á. Ljósmynd/Kristín Hallgrímsdóttir

Lokatölur í leiknum urðu 3:3 og þá þurfti að útkljá málin í vítakeppni. Þar klúðruðu menn spyrnum sínum hver í kapp við annan. Blikar skoruðu einu sinni en KA þrisvar. Fögnuður Norðanmanna var mikill í lokin og lið KA er komið í úrslit í fyrsta skipti í 19 ár.

KA hefur aldrei orðið bikarmeistari en fær nú fjórða tækifæri sitt til að vinna bikarinn. Akureyringar töpuðu úrslitaleikjunum 1992, 2001 og 2004.

Það á svo eftir að koma í ljós hvort Víkingur eða KR muni fara í úrslitaleikinn gegn KA þann 26. ágúst.

Næstu verkefni liðanna verða svo í Evrópukeppni. Breiðablik fer til Írlands og spilar við Shamrock Rovers 11. júlí. KA spilar gegn Connah's Quay Nomads frá Wales 13. júlí á heimavelli Fram í Úlfarsárdal.