Stjarnan vann öruggan sigur á HK, 4:0, á Stjörnuvellinum í þriðja riðli deildabikars karla í fótbolta í kvöld.
Hinn átján ára gamli Róbert Frosti Þorkelsson var í stuði fyrir Stjörnuna og skoraði tvö mörk, en hann gerði annað og þriðja mark Garðbæinga.
Helgi Fróði Ingason og Emil Atlason komust einnig á blað fyrir Stjörnuna, sem er í fjórða sæti riðilsins með fjögur stig. HK er með eitt stig.
Í sama riðli vann Fjölnir sigur á Njarðvík í Reykjaneshöllinni, 3:0, en bæði lið leika í 1. deild. Máni Austmann Hilmarsson, Óliver Dagur Thorlacius og Kristófer Dagur Arnarsson skoruðu mörk Fjölnis.
Fjölnir er í þriðja sæti með sjö stig, Njarðvík er í fimmta með eitt.
Í riðli 2 vann úrvalsdeildarlið Fylkis öruggan sigur á Þrótti úr Reykjavík, 3:0, í Árbænum. Ómar Björn Stefánsson gerði tvö mörk fyrir Fylki og Guðmundur Tyrfingsson eitt. Fylkir er í þriðja sæti með sex stig og Þróttur í sætinu fyrir neðan, einnig með sex stig.