Knattspyrnumaðurinn Hrafn Tómasson varð fyrir því óláni að slíta krossband í hné í leik með liði sínu KR í fyrstu umferð Bestu deildarinnar um síðustu helgi.
Hrafn fór sárþjáður af velli í byrjun síðari hálfleiks í 4:3-sigri KR á Fylki í Árbænum á sunnudagskvöld og óttuðust KR-ingar strax hið versta.
Í samtali við Fótbolta.net staðfesti hann að myndataka hafi leitt í ljós að krossbandið væri slitið.
Tímabili hins tvítuga Hrafns er því lokið um leið og það hófst og gengst hann undir skurðaðgerð í byrjun næsta mánaðar.
Verður Hrafn frá keppni um níu mánaða skeið.