Miðjumaðurinn Teun Koopmeiners, leikmaður Atalanta, verður ekki með Hollandi á Evrópumótinu í knattspyrnu í Þýskalandi í sumar.
Hollenska knattspyrnusambandið greindi frá í dag en hann er annar lykilmaðurinn sem dettur út úr hópnum á tveimur dögum.
Í gær kom í ljós að Frenkie de Jong yrði ekki með á mótinu vegna meiðsla, líkt og Koopmeiners.
Báðir tveir hefðu að öllum líkindum verið byrjunarliðsmenn í hollenska liðinu og því um gríðarlegt áfall að ræða.
Holland hefur leik á mótinu næstkomandi sunnudag gegn Póllandi í D-riðli mótsins. Frakkland og Austurríki eru einnig í riðlinum.