„Ég held að þetta sé leikurinn fyrir Liverpool ef þeir ætla sér að gera eitthvað á tímabilinu,“ sagði Heimir Guðjónsson, þjálfari karlaliðs FH í knattspyrnu, í Fyrsta sætinu þegar rætt var um ensku úrvalsdeildina.
Manchester City tekur á móti Liverpool í stórleik deildarinnar á Etihad-vellinum í Manchester á laugardaginn en City er með 28 stig í efsta sætinu á meðan Liverpool er í öðru sætinu með 27 stig.
„Ef Liverpool vinnur þennan leik þá held ég að liðið geti farið langt í ár,“ sagði Heimir.
„Ég er mjög svartsýnn fyrir þennan leik og það er orðið langt síðan Liverpool vann á Etihad-vellinum þannig að ég er skíthræddur við þennan leik,“ sagði Aron Elvar Finnsson, íþróttablaðamaður á mbl.is og Morgunblaðinu, meðal annars.