Erik ten Hag verður rekinn úr starfi knattspyrnustjóra Manchester United eftir úrslitaleik liðsins í bikarkeppninni á Englandi gegn Manchester City á morgun.
Enski fjölmiðillinn The Guardian hefur þetta eftir áreiðanlegum heimildum og segir að sigur gegn Manchester City myndi ekki breyta neinu. Ákvörðun hafi þegar verið tekin.
Manchester United endaði í áttunda sæti úrvalsdeildarinnar í vetur, sem er slakasti árangur liðsins frá árinu 1990, og kemst ekki í Evrópukeppni næsta vetur nema liðinu takist að vinna Englandsmeistarana og nágranna sína í City í úrslitaleiknum á Wembley á morgun.
The Guardian óskaði eftir viðbrögðum frá Manchester United við fréttinni en félagið vildi ekkert segja um hana.