Forsvarsmenn PGA-mótaraðarinnar í golfi hafa tekið ákvörðun um að sameinast hinni umdeildu LIV-mótaröð.
LIV-mótaröðin er fjármögnuð af sádi-arabíska ríkinu og frá því að hún var sett á laggirnar hefur andað köldu milli forsvarsmanna mótaraðanna tveggja.
PGA hafði til að mynda meinað öllum kylfingum, sem ákváðu að þekkjast boð LIV um að taka þátt í mótum á vegum mótaraðarinnar, um þátttöku á mótum PGA.
Mótaraðirnar tvær hafa staðið í málaferlum, þar sem flest málin lúta að samkeppnismálum, allar götur síðan.
Nýr samningur, sem PGA og LIV, hafa undirritað bindur enda á öll málaferli og munu mótaraðirnar koma sér saman um nýtt heiti á sameiginlegu fyrirtæki.
Að loknu yfirstandandi tímabili geta svo allir kylfingar sem hafa skipt yfir til LIV og verið meinað að taka frekari þátt í mótum á vegum PGA sótt um aðild að síðarnefndu mótaröðinni að nýju.
Þessar breytingar ná einnig til Evrópumótaraðarinnar (e. DP World Tour), þar sem íslenski atvinnukylfingurinn Guðmundur Ágúst Kristjánsson er með keppnisrétt á tímabilinu.