Sænska liðið Sävehof tryggði sér í kvöld sæti í átta liða úrslitum Evrópudeildarinnar í handknattleik karla með því að leggja þýska liðið Hannover-Burgdorf að velli, 34:25, í síðari leik liðanna í umspili keppninnar.
Fyrri leiknum í Þýskalandi lauk með með fjögurra marka sigri Hannover-Burgdorf og var því verk að vinna fyrir Sävehof á heimavelli, sem vann einvígið samanlagt 64:59.
Sænsk lið hafa ekki riðið feitum hesti frá einvígjum sínum við þýsk lið á þessari öld og gerðist það raunar síðast árið 2003, fyrir 21 ári síðan, að sænskt félagslið hafði betur í einvígi gegn þýsku félagsliði í Evrópukeppni.
Í átta liða úrslitum bíður Sävehof enn erfiðara verkefni og aftur gegn þýsku liði, Teiti Erni Einarssyni og félögum hjá Flensburg.
Tryggvi Þórisson lék með Sävehof í kvöld en komst ekki á blað enda fyrst og fremst sterkur varnarmaður.
Heiðmar Felixson er þá aðstoðarþjálfari Hannover-Burgdorf.