„Við erum duglegir að halda fjáraflanir og erum í þessu allir saman,“ sagði Agnar Smári Jónsson leikmaður Vals í samtali við mbl.is. Hann og liðsfélagar hans hafa staðið í ströngu á tímabilinu og tekið þátt í sjö umferðum í Evrópubikarnum í handbolta sem kostar sitt.
„Það er mikill dugnaður í okkur og þannig gengur þetta upp. Ég var að reikna þetta gróflega og ferðakostnaðurinn, bara fyrir mig fyrir þessar sjö ferðir, er um 5-6 milljónir,“ sagði Agnar og hélt áfram:
„Þá er ég að tala um hótel, flug og uppihald. Þetta er helvíti dýrt. Þetta er alvöru ástríða. Ég er ekki í þessu fyrir peninga heldur til að upplifa og hafa gaman. Þetta er líf mitt.“