Íþróttir | HM í handbolta | mbl | 2.12.2023 | 21:20

Dagurinn búinn að vera frábær

Hildigunnur var glöð í bragði er hún ræddi við mbl.is eftir leik. Ljósmynd/Jon Forberg

„Dagurinn er búinn að vera frábær,“ sagði Hildigunnur Einarsdóttir, landsliðskona í handbolta, í samtali við mbl.is í dag. Hildigunnur náði þeim glæsilega áfanga að spila sinn 100. landsleik þegar hún lék með Íslandi gegn Frakklandi á HM í Stafangri í Noregi í dag.

Eins og við var að búast reyndist franska liðið of sterkt fyrir það íslenska, enda um eitt allra besta lið heims að ræða.

Hildigunnur Einarsdóttir er klár í slaginn gegn Angóla. Ljósmynd/Jon Forberg

„Við vissum að við værum að mæta einni sterkustu þjóð heims. Við komum því með aðeins öðruvísi hugarfar inn í þennan leik. Okkur langaði að eiga góðan leik til að reyna að taka eins mikið úr leiknum og við gátum.

Þetta var ekki eins og á móti Slóveníu þar sem við ætluðum okkur sigurinn. Núna vildum við eiga góðan leik og skoða hann eftir á. Við áttum fínan leik í dag, en byrjunin varð okkur að falli.

Það þýðir ekki að byrja svona, en það voru margir frábærir punktar og gaman að fá hundraðasta leikinn á móti einni bestu þjóð í heimi,“ bætti hún við, en Frakkland skoraði sjö fyrstu mörkin og íslenska liðið var í miklu basli.

Hildigunnur Einarsdóttir Ljósmynd/Jon Forberg

„Við fundum engar glufur í byrjun og þetta var mjög erfitt. Það var langt í næsta mann og við urðum svolítið ráðalausar því uppleggið okkar gekk ekki upp. Sem betur fer náðum við að laga það og urðum ákafari. Við erum svolítið lengi í gang þegar við lendum í mótlæti í byrjun,“ sagði hún.

Ísland vann seinni hálfleikinn með einu marki og átti flott tilþrif inn á milli og ágætan leik í 30 mínútur. „5-1 vörnin var góð hjá okkur og við náðum að stela boltanum og minnka mistökin. Það kom ró í leikinn og meiri trú í leikmenn. Við áttuðum okkur á að við getum þetta alveg. Stundum þurfum við bara að stilla hausinn rétt.“

Næst á dagskrá hjá liðinu er úrslitaleikur við Angóla um sæti í milliriðli, en tapliðið fer í forsetabikarinn.

„Við erum búnar að tala um þennan leik við Angóla frá því í síðustu viku og við verðum að mæta þar frá fyrstu mínútu. Angóla er sterkt lið sem hefur átt góða leiki á þessu móti. Ef við mætum ekki rétt til leiks refsa þær okkur. Þetta er undir okkur komið. Við þurfum að trúa því að við séum betri en þær,“ sagði Hildigunnur.