Ísland mætir Paragvæ í öðrum leik sínum í Forsetabikarnum á HM kvenna í Frederikshavn í Danmörku klukkan 17.
Íslenska liðið vann 37:14-stórsigur á Grænlandi í fyrsta leik riðils 1, á meðan Paragvæ mátti þola 20:23-tap gegn Kína.
„Ég er næstum stærri en þær allar. Þær eru litlar og kvikar. Þær spila skemmtilegan sóknarbolta og eru aggresívar í vörn.
Þetta verður skemmtilegt verkefni á móti þeim,“ sagði Sandra Erlingsdóttir, leikstjórnandi íslenska liðsins, í samtali við mbl.is um paragvæska liðið.
Sandra er 160 sentímetrar á hæð og því vön því að spila við hávaxnari leikmenn, sem breyting verður á í dag.