Fjarðarkaup í Hafnarfirði tróna á toppnum á lista MMR yfir þau fyrirtæki sem Íslendingar mæla helst með annað árið í röð. Þetta kemur fram í fréttatilkynningu frá MMR og er á meðal þess sem fram kemur í niðurstöðum nýjustu mælingar fyrirtækisins á meðmælavísitölu 135 þjónustu- og framleiðslufyrirtækja.
Fram kemur að Fjarðarkaup hafi verið á meðal tíu efstu fyrirtækja frá því að mælingar hófust 2014. Líkamsræktarstöðin Hreyfing er í öðru sæti, bensínstöð Costco í því þriðja og hljóð- og rafbókaþjónustan Storytel í fjórða sæti. Þá er mjólkurvinnslan Arna í Bolungarvík í fimmta sæti en þetta er í fyrsta sinn sem fyrirtækið er mælt.
Bílaumboðið Toyota er í sjötta sæti, Hamborgarabúlla Tómasar í sjöunda sæti og líkamsræktarstöðin Reebook Fitness í því áttunda. Þá koma Sambíóin Egilshöll í níunda sæti og IKEA í því tíunda.