Þríburi fæddi þríbura

Judit Minda varð móðir í byrjun árs þegar hún eignaðist þríbura í Noregi. Minda hefur haldið úti áhugaverðri Instagram-síðu síðan hún áttaði sig á því að hún ætti von á þríburum. Ekki nóg með að vera þríburamamma þá er Minda sjálf þríburi. Minda segir á Instagram að líkurnar á því að þríburi eignist þríbura sé einn á móti sex milljón.  

„Að vera þríburi var oft best í heimi en stundum var það líka hræðilegt. Það var alltaf verið að bera okkur saman. Við vorum ekki kallaðar nöfnunum okkar heldur bara talað um okkur sem Mindas,“ sagði Minda í viðtali á vef Today.com. 

Minda sagðist alveg hafa viljað eignast þrjú börn en þrjú börn í einu var ansi stór skammtur. Í pistli á Instagram segist hún hafa grátið mikið þegar hún kom úr öðrum sónarnum. Í þeim sónar fann læknirinn tvö börn til viðbótar. Segist hún hafa verið lengi að meðtaka það að hún ætti von á þremur börnum. 

Minda greinir frá því á vef Today að hún glími við sjúkdóm sem veldur aukinni hjartsláttartíðni. Læknarnir höfðu áhyggjur af því hvernig henni myndi ganga að ganga með þríbura með sjúkdóminn. Ráðlögðu þau verðandi þríburaforeldrunum að láta fjarlægja að minnsta kosti eitt fóstur. Parið ákvað þó að gera það ekki. 

Eftir 34 vikna meðgöngu komu svo þríburarnir Filip Alexander, Amelia Helena og Henrik Mikael í heiminn. Í einlægum pistli á Instagram þakkar Minda líkamanum sínum fyrir að hafa verið heimili barna sinna í 34 vikur. Hún segist hafa kallað líkama sinn öllum illum nöfnum áður fyrr en nú finnst henni líkami sinn vera æðislegur.

• Blogga um frétt