Staðgöngumóðir fyrir dóttur sína 51 árs gömul

Hin 51 árs gamla Julie Loving gengur nú með barnabarn sitt fyrir dóttur sína, Breönnu Lockwood. Breanna komst að því eftir fjölda tilrauna til tæknifrjóvgunar að hún getur ekki gengið með börn, svo móðir hennar bauðst til að ganga með barnið fyrir hana. 

Breanna giftist eiginmanni sínum, Aaron Lockwood, árið 2016 og í kjölfarið fóru þau að reyna að eignast börn. Það gekk þó brösuglega en Breanna fór í nokkrar tæknifrjóvganir og í aðgerðir til að reyna að auka frjósemina. Eftir nokkur fósturlát sögðu læknar henni að hún gæti ekki eignast börn. 

„Að kljást við ófrjósemi er það erfiðasta sem ég hef á ævi minni tekist á við. Þegar þú ert með plan fyrir lífið og eitthvað eins og ófrjósemi kemur í veg fyrir að það gangi upp líður þér eins og þú sjáir ekki heildarmyndina,“ sagði Breanna í viðtali við Good Morning Amercia.

Læknirinn hennar lagði til að Breanna og Aaron leituðu sér að staðgöngumóður sem gæti gengið með barnið fyrir þau. Hann lagði til að þau fyndu fjölskyldumeðlim eða einhvern nákominn til að ganga með barnið til að spara. 

Hann var þó ekki fyrstur með hugmyndina, en mamma Breönnu, Julie stakk einnig upp á staðgöngumæðrum. 

„Ég byrjaði að tala við hana um það. Hún var ekki í til í það og fannst ég klikkuð. En ég hélt áfram að stinga upp á því. Ég hef hlaupið 19 maraþon og oft keppt í þríþraut. Mér leið eins og heilsulega séð gæti ég gert það, og mínar tvær meðgöngur gengu mjög vel,“ sagði Julie. 

Eftir heimsóknir til fjölda sérfræðinga kom í ljós að Julie var besti valmöguleiki hjónanna svo þau ákváðu að láta slag standa. 

• Blogga um frétt