Alex Oxlade-Chamberlain, leikmaður Liverpool, og söngkonan Perrie Edwards eiga von á sínu fyrsta barni saman. Parið sagði frá gleðifréttunum á samfélagsmiðlum í vikunni.
Edwards er hvað þekktust fyrir að vera liðskona bresku hljómsveitarinnar Little Mix. Önnur liðskona sveitarinnar, Leigh-Anne Pinnock, greindi frá því í síðustu viku að hún ætti einnig von á barni með unnusta sínum Andre Gray.
Oxlade-Chamberlain og Edwards hafa verið saman síðan 2016 en hún var áður í sambandi með tónlistarmanninum Zayn Malik.
Stjörnuparið opinberaði samband sitt á samfélagsmiðlum í febrúar 2017 þegar þau birtu mynd af sér að kyssast fyrir framan Eiffel-turninn í París.