Vilhjálmur Bretaprins sló á létta strengi í heimsókn hans og Katrínar hertogaynju á Norður-Írlandi í vikunni. Hjónin heimsóttu búgarð þar sem þeim gafst tækifæri til að skoða ýmis framandi dýr, þar á meðal kyrkislöngu.
Börn þeirra Vilhjálms og Katrínar, Georg, Karlotta og Lúðvík eru mjög hrifin af framandi dýrum eins og fram kom þegar þau fengu að spjalla við sjónvarpsmanninn David Attenborough á síðasta ári. Börnin fengu þó ekki að fljóta með í ferð foreldranna, enda koma þau sjaldan með þeim í vinnuferðir á vegum krúnunnar.
„Georg verður svo fúll. Börnin munu ekki trúa því að ég hafi gert þetta,“ sagði Vilhjálmur þegar hann handlék eina slönguna. Hann hafði einnig orð á því hversu mjúk slangan væri. „Ég ætla ekki að spyrja þig hvernig þú veist að þetta er hún, við tölum um það seinna,“ sagði prinsinn þegar starfsmaður vísaði til slöngunnar í kvenkyni.
Katrín fékk einnig að halda á tarantúlu en Karlotta dóttir þeirra er gríðarlega hrifin af köngulóm og spurði einmitt Attenborough hvort hann væri líka hrifinn af köngulóm eins og hún.