Ofurfyrirsætan Naomi Campbell tjáði sig í fyrsta sinn um tilkomu dóttur sinnar í viðtali við breska Vogue. Fyrirsætan greindi frá því á Instagram í maí 2021 að hún væri orðin móðir.
Fyrirsætan sem verður 52 ára í vor greindi ekki frá því hvort hún hefi fengið hjálp frá staðgöngumóður en tók það skýrt fram að dóttir hennar væri ekki ættleidd. „Hún var ekki ættleidd – hún er barnið mitt,“ sagði Campbell í viðtalinu. Hún ætlar að bíða með nánari lýsingar þangað til að hún skrifar ævisögu sína.
Campbell sem sat fyrir með dóttur sína í fanginu í tískutímaritinu hefur kosið að halda eins miklu leyndu varðandi dóttur sína og hún getur. Hún vill ekki greina frá nafni hennar og vissu fáir að hún ætti von á barni áður en hún greindi frá fæðingu hennar í fyrra. „Ég get talið á fingrum annarrar handar þann fjölda fólks sem vissi að ég væri að fara eignast hana,“ sagði Campbell og sagði dóttur sína það besta sem hafði komið fyrir sig.