Bandaríski bakpokaframleiðandinn Aer hakar við öll boxin hjá þeim sem vilja ferðast létt en vera um leið smekklega útlítandi. Þannig halda margir upp á Travel Pack-bakpokann sem er af hárréttri stærð fyrir handfarangursreglur allra flugfélaga og rúmar tölvu og hæfilegt magn af fatnaði fyrir nokkurra daga ferðalag – allt í mjög nettum og vel skipulögðum pakka.
Naumhyggja einkennir hönnunina, án þess samt að notagildinu sé fórnað, og ferðalangurinn stingur ekki í stúf með þennan grip á bakinu, hvort heldur sem er hátt uppi í austurrísku Ölpunum eða djúpt ofan í neðanjarðarlestakerfi stórborgar.
Í tilefni af fimm ára afmæli fyrirtækisins hefur Aer hafið sölu á sérútgáfu af sínum vinsælustu bakpokum. Er ytra byrðið úr hátækniefninu X-Pac sem á bæði að vera mjög slitsterkt og vatnshelt. Að innan eru bakpokarnir svo fóðraðir með skærlitu rauðgulu efni sem hjálpar eigandanum að finna það sem hann gramsar eftir.