Thelma Jónsdóttir er forfallinn kjólasafnari og klæðist ekki öðru en vintage-kjólum. Á ferðalögum sínum erlendis þræðir hún gjarnan vintage og second hand verslanir í leit að gullmolum og oftar en ekki er heppnin með henni.
„Stundum heimsæki ég þessar verslanir bara til þess að dást að flíkunum og fer alls ekki alltaf út með kjól, en oftast kaupi ég þó eitthvað, eins og eyrnalokka eða slæðu,“ segir Thelma sem heldur úti Instagramsíðunni Kjólasafn Thelmu þar sem sjá má ýmsar gersemar sem keyptar hafa verið á ferðalögum hennar erlendis sem og hér heima. Thelma bjó lengi í Berlín, sem er að hennar sögn gósenland fyrir second hand aðdáendur, en hún á þó líka uppáhalds vintageverslanir víðar í Evrópu. Hér deilir hún sínum uppáhaldsverslunum í Berlín, Edinborg, Barcelona, Amsterdam og Kaupmannahöfn.
„Þessi verslun, sem er í miðborg Kaupmannahafnar, er afar fögur en eins og nafnið gefur til kynna er hún tileinkuð leikkonunni Audrey Hepburn og allt þar inni í hennar anda og afar „elegant“. Þarna má finna lúxus vintage og second hand vörur sem koma beint frá París. Mjúkir litir eru allsráðandi en vintage kjólarnir eru flestir í frekar litlum stærðum.“
„Þessi verslun sem er í hjarta Edinborgar sérhæfir sig í vintage fatnaði og fylgihlutum frá 1940 til 1970 og er allt flokkað eftir áratugum. Eigandi búðarinnar, Rachael, er afar vinaleg og greinilega með mikla ástríðu fyrir vintage. Mikið úrval af höttum svona í anda Breta.“
„Þessi dásamlega búð er í eigu hjónanna Joan og Africa sem standa ávallt sjálf vaktina í versluninni. Fötunum er raðað upp eftir tímabilum og á veggina er Joan búinn að mála skemmtilegar myndir sem eru lýsandi fyrir hvern áratug. Flott úrval af eyrnalokkum og öðrum fylgihlutum.“
„Stór búð á tveimur hæðum sem hefur verið starfrækt í meira en 30 ár. Afar mikið úrval af gersemum sem eru gjarnan flokkaðar eftir litum en þarna má finna allt frá sundhettum og sundbolum til galakjóla og upphárra hanska. Fylgihlutir eru sérstaklega áberandi á efri hæðinni en gala- og brúðarkjólar á þeirri neðri. Þarna er einnig fínasta herradeild.“
„Gersemar úr fataskápum annarra er slagorð Lili Anders sem er eigandi Fräulein Anders. Þar má finna breitt úrval af fatnaði þ.e.a.s. bæði vintage og second hand en Lili velur inn vörur í búðina af mikilli kostgæfni.“