Algengara að fólk fari á minna þekkta staði

Þórunn Reynisdóttir forstjóri Úrval Útsýn.

Þegar Þórunn er spurð að því hvað sé spennandi við ferðabransann nefnir hún aðallega það hvað það séu örar breytingar í þeim bransa og hann kalli stöðugt á ný tækifæri. Spurð hvernig ferðalög fólks séu að breytast segir hún að fólk fari víðar en áður.

„Það sem hefur breyst er að fólk hefur meira þor til að fara á staði sem eru minna þekktir. Einnig að nú fer fólk oftar í bæði styttri og lengri ferðir,“ segir Þórunn.

Hefur það komið niður á ferðaskrifstofum að fólk panti ferðir sjálft á netinu?

„Ég get ekki sagt að það hafi komið niður á ferðaskrifstofunum þar sem ferðaskrifstofur hafa boðið þá þjónustu að fólk bóki á netinu. Við erum stöðugt að efla okkar þjónustu og úrval fyrir okkar viðskiptavini á netinu.“

Hvað græðir fólk á því að láta ykkur bóka fyrir sig ferðina?

„Ég myndi ekki nota orðið græða enda keppumst við við að hafa hagstæðustu kjörin á hverjum tíma. Það sem skiptir máli er að þegar ferð er keypt hjá okkur þá erum við með fararstjóra á okkar sólaráfangastöðum, 24 tíma vaktsíma ef eitthvað kemur upp á meðan á dvöl stendur. Einnig ef þarf að gera breytingar á ferðalaginu þá erum við sérfræðingar í að leiðbeina með þær breytingar og finna hagkvæmasta kostinn hverju sinni,“ segir hún.

Hver er þinn uppáhaldsáfangastaður?

„Einn af uppáhaldsáfangastöðum mínum er St. Martin, sem er eyja í Karíbahafinu. Þar hef ég átt mitt besta frí með fjölskyldunni. Eyjan er lítil og þar er vingjarnlegt fólk.“

Í hvernig frí finnst þér best að fara?

„Mér finnst best að fara í frí þar sem ég næ að spila smá golf, þar sem er líflegt mannlíf og líka afslappað umhverfi.“

Hvað drífur þig áfram í vinnunni?

„Það sem drífur mig áfram eru nýjungarnar í okkar umhverfi og að ná að gera betur á hverjum degi. Hafa gaman af því sem ég er að gera á hverjum tíma.“

Hvernig mun ferðabransinn breytast á næstu árum?

„Hann mun halda áfram að þróast í þá átt að það heldur áfram að verða fjölbreytileiki í því sem er verið að bjóða upp á á áfangastöðunum, flugi og tækni.“