Vinsælt er að dvelja í einskonar fljótandi hótelsvítu á Maldíveyjum. Nú er lúxushótelið Soneva Fushi að opna nýjar villur sem verða stærstu fljótandi villur í heiminum miðað við eins og tveggja herbergja villur á vatni.
Nýju gistirýmin verða tekin í notkun í september og búa yfir svakalegum lúxus. Heillandi sjórinn umlykur íbúðirnar auk þess sem langt er í næstu íbúð miðað við það sem gengur og gerist á Maldíveyjum. Það flottasta við villurnar eru líklega rennibrautirnar en vatnsrennibrautir eru á húsunum svo gestir geta rennt sér í sjóinn.
Í villunum eru útibaðherbergi, hægt er að opna þakið í svefnherbergjunum til þess að horfa á stjörnurnar. Einkaþjónn fylgir einnig.
Að gista á hótelinu er ekki fyrir hvern sem er en villa með einu svefnherbergi kostar frá 2.626 bandaríkjadölum eða rúmlega 300 þúsund krónum. Nóttin í tveggja svefnherbergja villu kostar frá 5.232 bandaríkjadölum eða rúmlega 700 þúsund krónum.
Maldíveyjar eru vinsæll áfangastaður meðal þeirra ríku og frægu. Þekktir Íslendingar hafa einnig verið duglegir að heimsækja áfangastaðinn á undanförnum árum.