Þeir sem heimsækja kastala Drakúla í Rúmeníu geta nú fengið tvo fyrir einn; bóluefni frá Pfizer og skoðunarferð um kastalann. Bólusetningarstöð hefur verið sett upp í kastalanum í tilraun til að hvetja landsmenn til að fara í bólusetningu.
Kastalinn, Bran-kastali, var byggður á 14. öld og er sagður vera kastalinn sem veitti rithöfundinum Bram Stoker innblástur fyrir vampírubókina Drakúla.
Yfir milljón smit hafa greinst í Rúmeníu í faraldrinum og 29 þúsund dauðsföll hafa verið skráð. Stjórnvöld stefna að því að vera búin að bólusetja 10 milljónir manns fyrir september en helmingur landsmanna segist ekki hafa áhuga á bólusetningu samkvæmt könnun Globesec.
Einstök staðsetning bólusetningarstöðvarinnar í Bran-kastala er því tilraun til að hvetja fólk til að þiggja bólusetningu. Hver sem er getur mætt í kastalann allar helgar í maí án þess að bóka sér tíma, fengið bólusetningu og fría ferð um kastalann.
„Hugmyndin var að sýna fólki hvernig fólk var bólusett fyrir 500 til 600 árum í Evrópu,“ segir Alexandru Priscu í viðtali við fréttastofu Reuters.
Tilgangur bólusetningarstöðvarinnar í kastalanum er ekki bara tilraun til að fá fleiri til að þiggja bóluefni heldur einnig tilraun til að fá fólk til að ferðast meira innanlands.