Ísland er svo sannarlega falin perla þegar kemur að fjallahjólreiðum en landið státar af einstaklega mörgum fallegum hjólaleiðum. Það er fullt af þægilegum og auðveldum hjólaleiðum í og við borgarmörkin en mínar uppáhaldshjólaleiðir á Suðurlandinu eru í aðeins meiri fjarlægð frá Reykjavík.

Þar kemur Friðland að Fjallabaki eða bara Fjallabak mjög sterkt inn. Svæðið var gert að friðlandi árið 1979 og er hluti af hálendi Íslands sem er norðan Mýrdalsjökuls, norður til Landmannalauga og Hrauneyja.

Svæðið er um 47 ferkílómetrar og er í einu orði sagt einstakt þegar kemur að landslagi og náttúru. Það einkennist meðal annars af ám, vötnum, hraunum og hverasvæðum.  Það er líka einstaklega litríkt og þar er að finna margar af vinsælustu gönguleiðum landsins, til dæmis Laugaveginn, þar sem flestir kjósa að ganga úr Landmannalaugum yfir í Þórsmörk.

Löðmundur á Fjallabaki er norðan Landmannaleiðar en fjallið er grasi vaxið frá fjallsrótum. Það er best að leggja af stað í átt að Löðmundi upp frá Landmannahelli en útsýnið á toppi fjallsins er algjörlega magnað.

Þar sést nánast allt hálendið milli Langjökuls, Hofsjökuls og Vatnajökuls. Hæsti tindur fjallsins heitir Strókur og stendur hann í tæplega 1.100 metra hæð.

Fjallið er hins vegar mjög bratt á einum stað og þar er betra að skella fjallahjólinu á bakið, eða teyma það upp.

Heilt yfir ætti þetta ferðalag að taka í kringum 3-4 klukkustundir, rúmlega 10 kílómetrar og rúmlega 550 metra hækkun, og þó það geti verið erfitt að hjóla upp í móti á einhverjum tíma er erfiðið svo sannarlega þess virði þegar komið er á toppinn sjálfan.

Smelltu hér til að fylgja mér á Instagram.

Þegar hjólað er á hálendi Íslands er afar mikilvægt að hjóla alls ekki utan merktra leiða eða stíga og muna að bera alltaf virðingu fyrir landinu.