Leyndardómar Heiðmerkur

Það er fallegt um að litast í Heiðmörk.
Það er fallegt um að litast í Heiðmörk.

Íslensk náttúra hefur mikið aðdráttarafl og stöðugt fleiri stunda útivist sér til ánægju og heilsubótar. Að ferðast um landið er bæði gefandi og skemmtilegt og við kynnumst náttúru landsins, sögu, menningu, dýralífi og þannig mætti lengi telja. Þó svo að það sé gaman að ferðast um landið og heimsækja þekkta ferðamannastaði þarf ekki alltaf að leita langt yfir skammt. Víða í nærumhverfinu má finna náttúruperlur, kyrrð og fegurð.

Heiðmörk er stærsta útivistarsvæðið á höfuðborgarsvæðinu og eitt það vinsælasta og stöðugt fleiri njóta þar fjölbreyttrar útivistar og náttúru. Í gegnum tíðina hafa ótal stígar verið lagðir um svæðið og góð aðstaða byggð upp fyrir útivistarunnendur. Heiðmörk einkennist meðal annars af skóglendi sem þekur tæpan þriðjung svæðisins en að auki er þar að finna áhugaverðar jarðmyndanir, viðkvæmt votlendi og lyngmóa. Dýralíf er fjölbreytt í Heiðmörk og þar má einnig finna mannvistarleifar, allt frá fyrstu tíð Íslandsbyggðar til okkar daga.

Sögu Heiðmerkur sem útivistarsvæðis má rekja aftur til ársins 1947 þegar bæjarstjórn Reykjavíkur samþykkti að stofna friðland og skemmtigarð fyrir Reykvíkinga í Heiðmörk. Svæðið var vígt árið 1950 og sama ár hóf Skógræktarfélag Reykjavíkur skógrækt þar. Upphaflega var friðlandið stofnað úr landi Elliðavatnsbæjar og úr hluta af landi Hólms og Vatnsenda. Árið 1957 bættist við sá hluti Heiðmerkur sem nú er innan Garðabæjar en tilheyrði þá Vífilsstöðum og afrétti Garðatorfu. Skógræktarfélag Reykjavíkur fer enn með umsjón svæðisins, í góðu samstarfi við Reykjavíkurborg, Orkuveitu Reykjavíkur og Garðabæ. Á heimasíðu Skógræktarfélags Reykjavíkur, www.heidmork.is, má finna góðar upplýsingar um Heiðmörk og kort af svæðinu.

Á meðal áhugaverðra áningarstaða í Heiðmörk má nefna:

Helluvatn

Á áningarstaðnum við Helluvatn er grillaðstaða undir þaki.

Vígsluflöt – Rariklundur

Heiðmörk var stofnuð formlega 25. júní 1950 á Vígsluflöt. Á vígsluhátíðinni gróðursetti þáverandi borgarstjóri, Gunnar Thoroddsen, sitkagreniplöntu sem í dag er myndarlegt tré.

Símamannalaut

Símamannalaut er afrakstur kraftmikils landnemastarfs en Félag íslenskra símamanna hóf gróðursetningu þá strax eftir friðun Heiðmerkur árið 1950. Í Símamannalaut eru grill,borð og bekkir.

Furulundur – Dropinn

Furulundur var gerður árið 2000 í tengslum við að Reykjavík var kjörin Menningarborg Evrópu. Þetta er fjölskyldulundur búinn leiktækjum, blakvelli og grillaðstöðu. Inn af Furulundi er Dropinn, áningarstaður með grilli, borðum og bekkjum.

Grenilundur

Grenilundur er fjölskyldurjóður frá 2005. Þar er grillaðstaða, bílastæði og leik- og klifurtæki. Grenilundur rúmar um 50 manns.

Þjóðhátíðarlundur

Skógræktarfélag Reykjavíkur stofnaði Þjóðhátíðarlund árið 1974 til að minnast 1100 ára afmælis Íslandsbyggðar og jafnframt 75 ára afmælis skógræktar á Íslandi. Þjóðhátíðarlundur er í Löngubrekkum og skammt frá eru Hulduklettar. Í Þjóðhátíðarlundi er grill, borð og bekkir, bílastæði, leiktæki og fótboltavöllur.

Vífilsstaðahlíð

Árið 1958 varð Vífilsstaðahlíð hluti af Heiðmörk eftir samninga milli Skógræktarfélags Reykjavíkur og stjórnar ríkisspítalanna. Þá var strax hafist handa við gróðursetningu þar. Í Vífilsstaðahlíð er einnig að finna trjásafn sem Skógræktarfélag Reykjavíkur byrjaði að gróðursetja árið 1990. Í Vífilsstaðahlíð er yfirbyggt grill og bílastæði.

Hjallaflatir

Hjallaflatir eru stærsti áningarstaður Heiðmerkur. Þar er fótboltavöllur og grillaðstaða.

Fræðslurjóður

Fræðslurjóðrin eru austan við Elliðavatnsbæinn. Í fræðslurjóðrunum fer fram náttúru- og umhverfiskennsla fyrir börn og unglinga.

Það er vel við hæfi að hvetja alla til að leggja leið sína í Heiðmörk, ekki síst nú á 70 ára afmæli Heiðmerkur sem friðlands og skemmtigarðs, og njóta þar útivistar og náttúru. Í sérstökum landnemareitum sem Skógræktarfélag Reykjavíkur hefur í gegnum tíðina úthlutað til félagasamtaka, fyrirtækja og einstaklinga til skógræktar er reitur Ferðafélags Íslands nr. 24 í svæði h. Þar má finna skemmtilegan ratleik sem öllum er velkomið að taka þátt í. Góð stund í Heiðmörk fyllir fólk af orku, gleði og hamingju og veitir hvíld og slökun.

Þessi mynd var tekin á Skógarleikunum í Furulundi 2019.
Þessi mynd var tekin á Skógarleikunum í Furulundi 2019. mbl.is/Arnþór Birkisson
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »