Sex íslenskir hönnuðir taka nú þátt í fatahönnunarsýningunni CPH Vision í Öksnehallen á tískuvikunni í Kaupmannahöfn. Flestir þessara hönnuða eru að sýna þar í fyrsta sinn og jafnvel að fara á fyrsta sinn á sýningu erlendis. Íslandsstofa skipulagði þátttöku þeirra í sýningunni en þeir sýna bæði skó- og fatahönnun.
Að sögn Berglindar Steindórsdóttur hjá Íslandsstofu í fréttatilkynningu fengu hönnuðirnir strax á fyrsta degi mjög góð viðbrögð og hafa gestir verið að tjá sig um ágæti hönnunarinnar. Þá hafi pantanir verið teknar niður og einnig hafa sumir hönnuðirnir komist í kynni við dreifingaraðila og eða umboðsaðila til að vinna með í framtíðinni.
Íslensku hönnuðirnir eru Sonja Bent, Royal Extreme, E-Label, Kron by KronKron, Birna Trading og Kurl Project.