Vetrarhátíðin hefst fimmtudaginn 9. febrúar

Marcos Zotes, sigurvegari hugmyndasamkeppni Vetrarhátíðar í Reyjavík, og Chris Jordan munu hefja Vetrarhátíð í ár með verkinu Rafmögnuð náttúra en í því verki leikur Hallgrímskirkja aðalhlutverkið.

Verkinu verður varpað á framhlið kirkjunnar með hjálp skjávarpa og á það að skapa mikla upplifun hjá áhorfendum, samkvæmt fréttatilkynningu. Meðan á sýningu verksins stendur mun hljómsveitin For a Minor Reflection flytja frumsamda tónlist.

Í kjölfar opnunaratriðisins munu Marcos Zotes og Chris Jordan fremja gagnvirkan myndbandsflutning. Þá mun gangandi vegfarendum gefast þess kostur að hafa áhrif á það hvernig myndirnar varpast á kirkjuna. Í verkinu notast höfundar meðal annars við upptökur af virkni sólarinnar frá stjörnuskoðunardeild NASA.

Í tilkynningu frá höfundum verksins segir: „Einnig mun röð staðbundinna innsetninga ögra rýmisskynjun áhorfenda í gjörningi sem máir út mörkin milli kvikmyndunar, dans og arkitektúrs.“

Opnunaratriði hátíðarinnar hefst klukkan 19:30 fimmtudaginn 9. febrúar og aðrir viðburðir munu hefjast klukkan 20:00 og standa til miðnættis frá fimmtudegi til sunnudags.

• Blogga um frétt