Leikkonan og fyrirsætan Cara Delevingne bættist í gær, miðvikudag, í hóp þeirra kvenna sem hafa lýst reynslu sinni af Harvey Weinstein. Delevingne sagði frá reynslu sinni á Instagram.
Áður en Delevingne sem er tvíkynhneigð átti fund með Weinstein talaði hún við hann í síma þar sem hann sagði henni að ef hún ætti í ástarsambandi við konu, sérstaklega opinberlega mundi hún aldrei fá gagnkynhneigt hlutverk.
Þegar hún hitti hann hinsvegar var hún hvött til þess að fara með honum upp á hótelherbergi. Henni fannst það óþægilegt en gerði það engu að síður. Þegar hún kom á herbergið sá hún aðra konu og létti henni mikið við það. Weinstein bað þær hinsvegar um að kyssast og gerði hin konan sig líklega til að fylgja skipunum Weinstein. Delevingne fór hinsvegar að syngja til að koma sér út úr aðstæðunum.
„Eftir að hafa sungið sagðist ég aftur þurfa að fara. Hann fylgdi mér að hurðinni og stóð fyrir framan hana og reyndi að kyssa mig á varirnar. Ég stoppaði hann og náði að koma mér út úr herberginu,“ sagði Delevigne sem lék eftir þetta í mynd sem Weinstein framleiddi.