Tónlistarkonan Greta Salóme Stefánsdóttir er meðhöfundur lags sem keppir í undankeppni Eurovision í ár í Bretlandi. Lagið heitir Crazy og er það söngkonan RAYA sem flytur lagið.
Ásamt Gretu Salóme eru það Emil Rosendal Lei og Samir Salah Elshafie sem semja lagið. Á vef BBC kemur fram að RAYA sé bæði fjölhæf og vön söngkona. Hún getur dansað, leikið og þeytt skífum ásamt því sem hún er sögð hafa komið fram á stórum sviðum.
RAYA segir lagið fjalla um það þegar maður getur ekki hætt að hugsa um nýjan strák eða nýja stelpu. Lagið segir hún vera grípandi en hlusta má á lagið hér fyrir neðan.
Það kemur í ljós hvort að Greta Salóme fari í þriðja sinn í Eurovsion þegar Bretar velja framlag sitt þann 7. febrúar en sex lög keppa um að verða framlag Breta í ár.