Raunveruleikastjarnan og snyrtivöruframleiðandinn Kylie Jenner og rapparinn Travis Scott eignuðust barn saman í byrjun mánaðarins. Parið var ekki búið að vera lengi saman þegar barnið kom undir og er ekki að flýta sér í sambandinu þrátt fyrir að eiga barn saman.
Jenner og Scott eru enn saman en þau búa hins vegar ekki saman. „Kylie og Travis búa ekki formlega saman. Hann á sitt heimili. Þau eru að ala barnið upp saman,“ sagði heimildamaður People og bætti við að þau væru hamingjusöm.
Skötuhjúin eru greinilega ekki að flýta sér og hjónaband ekki á dagskrá hjá ungu móðurinni en Jenner er aðeins tvítug á meðan Scott er 25 ára.