Tískuhúsið Burberry hefur beðist afsökunar á að hafa látið fyrirsætu taka þátt í tískusýningu klæddri hettupeysu með reipi um hálsinn sem svipar til hengingarsnöru.
Sýningin var hluti af tískuvikunni í London um síðustu helgi þar sem nýjasta lína Burberry, Tempest, var kynnt. Ein af fyrirsætum á vegum Burberry, Liz Kennedy, vakti fyrst athygli á málinu í færslu á Instagram-síðu sinni. „Sjálfsmorð er ekki tíska,“ segir meðal annars í færslunni.
Marco Gobbeti, forstjóri Burberry, segir að fyrirtækið sé miður sín vegna atviksins og þeirra áhrifa sem flíkin gæti haft á þá sem börðu flíkina augum. „Þetta var ónærgætið og við gerðum mistök.“
Riccardo Tisci, listrænn stjórnandi fatalínunnar, segir að línan sæki innblástur til ungu kynslóðarinnar og uppreisna innan hennar. Liz, sem klæddist ekki hönnuninni umdeildu en tók þátt í sýningu Burberry, segir að hönnunin sé „hvorki heillandi né framúrstefnuleg“. Tisci hefur einnig beðist afsökunar en hann segir að hann hafi sótt sér innblástur til siglinga og því hafi reipið verið hluti af heildarútlitinu.
„Hvernig gat þetta farið fram hjá öllum og þeim fundist þetta í lagi? Sérstaklega þegar línan er tileinkuð ungmennum?“ spyr Liz í færslu sinni, þar sem hún bendir einnig á aukna sjálfmorðstíðni ungmenna á heimsvísu.
Gobbeti segir að tískuhúsið muni draga lærdóm af atvikinu og grípa til allra nauðsynlegra aðgerða til að koma í veg fyrir að svona nokkuð gerist aftur.