Dánarbú lagahöfundanna Richard Rodgers og Oscars Hammerstein II fær 90 prósent af höfundarlaununum fyrir lagið 7 rings með Ariönu Grande. Lag Grande byggir á laginu My Favourite Things úr söngleiknum Söngvaseiður (The Sound of Music).
Samkvæmt The New York Times var samningurinn gerður áður en lagið kom út fyrr á árinu og fóru lögfræðingar dánarbúanna fram á 90 prósent af höfundarlaununum. Grande fer því ekki í felur með það að 7 rings er byggt á My Favourite Things.
Afkomendur Rodgers og Hammerstein koma því til með að njóta gróðans, en Rodgers lést árið 1979 og Hammerstein árið 1960.
Lagið 7 rings situr nú í efsta sæti Billboard-listans í Bandaríkjunum, sjöttu vikuna í röð, og hefur verið spilað yfir milljarð sinnum á streymisveitunni Spotify.
My Favourite Things er best þekkt í flutningi leikkonunnar Julie Andrews sem fór með aðalhlutverkið í kvikmyndinni árið 1966. Upphaflegi söngleikurinn er þó mun eldri en kvikmyndin.