Leikkonan Roseanne Barr tístir nú undir dulnefni á samfélagsmiðlinum Twitter, að eigin sögn. Barr komst í fjölmiðla síðasta sumar eftir að hún sendi frá sér tíst fullt af kynþáttafordómum um Valerie Jarrett, fyrrverandi ráðgjafa Baracks Obama.
Hún var í kjölfarið rekin úr þáttunum Roseanne á ABC og framleiðslu þáttanna hætt. Barr reyndi að fegra ímynd sína með því að kenna öðrum um þessi ummæli sem hún lét falla. Hún hafði þó ekki erindi sem erfiði.
Barr sagði í viðtali við slúðurmiðilinn TMZ að hún léti engan bilbug á sér finna og hefur tekið upp á því að tísta alls konar vitleysu undir dulnefni á Twitter. Hún segir að þetta gefi henni tækifæri til að láta sitt raunverulega ljós skína, án þess að hún þurfi að hafa áhyggjur af afleiðingunum.