Harðlega gagnrýnd vegna þernuveislu

Kylie Jenner hefur verið harðlega gagnrýnd vegna búningaveislu sem hún hélt fyrir vinkonu sína Anastasiu Karanikolaou um helgina þar sem sjónvarpsþættirnir Handmaid´s Tale, eða Saga þernunnar, voru þemað.

Jenner setti á samfélagsmiðla myndskeið og ljósmyndir af sér og vinum sínum í rauðum kjólum með hvít höfuðföt eins og persónur þáttanna en þeir eru byggðir á bók Margaret Atwood.

Þótti Jenner gera lítið úr þeim þjáningum sem persónurnar ganga í gegnum í þáttunum, að því er BBC greindi frá. 

„Þetta er svo rangt á svo mörgum stigum. Að fagna þrældómi kvenna er ótrúlega heimskulegt og sýnir hversu fáfróð Kylie og vinir hennar eru,“ sagði einn þeirra sem gagnrýndu myndskeið hennar á Instagram.

„Þau skilja greinilega ekki um hvað bókin eða sjónvarpsþáttaröðin fjalla. Þetta er vandræðalegt.“

Í einu tísti á Twitter stóð: „Það er greinilega fátt skemmtilegra en að klæða sig upp sem konur sem er ítrekað nauðgað og verða fyrir grundvallarmannréttindabrotum.“

Aðrir á samfélagsmiðlum bentu á nýlega löggjöf um þungunarrof í Bandaríkjunum og sögðu að Jenner og vinir hennar „sem séu í forréttindahópi“ væru úr takti við raunveruleikann.

• Blogga um frétt