Sitt sýndist hverjum um ábreiðu Flóna á hinu sígilda lagi Stefáns Hilmarssonar og Eyjólfs Kristjánssonar „Draumurinn um Nínu“ sem hann flutti á seinna undanúrslitakvöldi Söngvakeppninnar í gær. Páll Óskar Hjálmtýsson, poppkóngurinn sjálfur, er himinlifandi með flutninginn og útsetningu lagsins.
„Mér finnst þetta gersamlega geðveik laglína og töff pródúserað lag við þennan þekkta texta,“ skrifar Páll Óskar undir færslu RÚV á Facebook þar sem sjá má flutning Flóna á Nínu. Páll Óskar segir angurværa laglínuna þjóna textanum, skilja inntak hans og draga fram hvað textinn er í raun sorglegur. „Súperhittari er fæddur,“ skrifar Páll Óskar.
Talsverðar umræður sköpuðust í kjölfarið og velti fólk fyrir sér hver hafi séð um „pródúseringu“ lagsins. Því er svarað í færslunni en bak við útsetningu lagsins standa þeir Arnar Ingi Ingason og Magnús Jóhann Ragnarsson.
Hér má sjá flutning Flóna á Draumur um Nínu: