Sjónvarpskonan Wendy Williams segir að fyrrverandi eiginmaður hennar Kevin Hunter hafi raðhaldið framhjá henni á meðan þau voru gift. Williams og Hunter voru gift í 22 ár en skildu 2019.
Williams ræddi hjónabandið í Jess Cagle Show á dögunum þar sem hún sagðist hafa vitað af framhjáhaldinu næstum frá fyrsta degi. „Við vorum gift í næstum því 22 ár. Við vorum saman í 25 ár. Ég sé ekki eftir deginum sem ég kynntist honum. Ég sé ekki eftir að hafa þolað hann í 25 ár. Og það tengist ekki því að hann hafi eignast þetta barn eða að hann hafi haft stelpu til hliðar í næstum 15 ár af hjónabandi okkar. Ég hef vitað um hana síðan í byrjun. Ég hef alltaf vitað að Kevin er raðframhjáhaldari,“ sagði Williams.
Williams sótti um skilnaðinn í apríl 2019 eftir að hún komst að því að hann hefði eignast barn með hjákonu sinni. Williams staðfesti þær fregnir í viðtali við New York Times.
Hunter sjálfur hefur ekki tjáð sig um málið eða staðfest að hann hafi eignast barn með annarri konu á meðan hann var giftur Williams.