„Ég fæ að sjá ljós, kærleik og alls konar birtingarmyndir. En ég get ekkert sagt: Þetta er svona,“ segir miðillinn Anna Birta Lionaraki um klemmuna sem hún kemst reglulega í þegar fólk hefur efasemdir um að hægt sé að sjá hluti sem eru handan okkar veraldlega heims. Hún líkir upplifuninni við að vera stödd í Hollywood kvikmyndinni The Truman Show.
Í myndskeiðinu hér að ofan segir hún frá því hversu snúið það getur verið að útskýra sína hlið á að sjá það sem aðrir sjá ekki.
Anna Birta er gestur Berglindar Guðmundsdóttur í Dagmálum í dag og segir frá reynslu sinni af miðilsstörfunum sem hún sinnir m.a. til viðskiptavina erlendis í gegnum netið.
Anna Birta fæddist á Íslandi en ólst upp í Grikklandi og lærði m.a. leiklist í Aþenu. Hún heldur því fram að skyggnigáfuna hafi hún fengið í arf og hefur mikinn áhuga á að rannsaka hvað líkamlegir þættir tengist henni. Fram undan er miðilsfundur hjá henni í Hannesarholti hinn 23. október en síðast þegar það stóð til hófst mikið fjölmiðlafár.
Viðtalið í heild sinni, sem er aðgengilegt fyrir áskrifendur Morgunblaðsins, er að finna hér en einnig er hægt að kaupa vikupassa hér.